ഡിജിറ്റല്‍ തീവ്രവാദവും ക്രിമിനല്‍ സിന്‍ഡിക്കേറ്റും. പാകിസ്ഥാന്റെ ഷഹ്സാദ് ഭട്ടി നെറ്റ്വര്‍ക്കിന് ഇന്ത്യയുടെ പൂട്ടു വീഴുമ്പോള്‍

രാജ്യ സുരക്ഷയെ വെല്ലുവിളിച്ച് പാകിസ്ഥാന്‍ കേന്ദ്രീകരിച്ച് പ്രവര്‍ത്തിക്കുന്ന ‘ഷഹ്സാദ് ഭട്ടി നെറ്റ്വര്‍ക്കിനെ’ (എസ്.ബി.എന്‍) കരിമ്പട്ടികയില്‍പ്പെടുത്തി കേന്ദ്ര ആഭ്യന്തര മന്ത്രാലയം. യു.എ.പി.എ. (UAPA) നിയമപ്രകാരമാണ് ഈ ഭീകരസംഘടനയെ ഔദ്യോഗികമായി നിരോധിച്ചിരിക്കുന്നത്. ഭീകരവാദത്തോട് ഒരു തരത്തിലും വിട്ടുവീഴ്ചയില്ലെന്ന (‘Zero Tolerance’) നയത്തിന്റെ ഭാഗമായാണ് കേന്ദ്ര സര്‍ക്കാരിന്റെ ഈ നിര്‍ണായക നടപടി.

പാകിസ്ഥാനില്‍ നിന്ന് ഡ്രോണുകള്‍ വഴിയും മറ്റും ഇന്ത്യയിലേക്ക് ആയുധങ്ങള്‍, അത്യാധുനിക സ്ഫോടക വസ്തുക്കള്‍, ലഹരിമരുന്നുകള്‍ എന്നിവ കടത്തുന്നതില്‍ സംഘം പ്രധാന പങ്കുവഹിച്ചു. സോഷ്യല്‍ മീഡിയ പ്ലാറ്റ്ഫോമുകളിലൂടെ യുവാക്കളെയും ചെറിയ കുറ്റകൃത്യങ്ങളില്‍ ഏര്‍പ്പെട്ടവരെയും ലക്ഷ്യമിട്ട് പണവും മറ്റും വാഗ്ദാനം ചെയ്ത് തീവ്രവാദ പ്രവര്‍ത്തനങ്ങളിലേക്ക് ആകര്‍ഷിച്ചു. രാജ്യത്തിന്റെ ജനാധിപത്യ സംവിധാനത്തെയും സാമുദായിക ഐക്യത്തെയും തകര്‍ക്കാന്‍ ലക്ഷ്യമിട്ട് വിദ്വേഷവും പ്രകോപനപരവുമായ ഡിജിറ്റല്‍ ഉള്ളടക്കങ്ങള്‍ വ്യാപകമായി പ്രചരിപ്പിച്ചു. അധോലോക കുറ്റവാടികളെയും തീവ്രവാദ സംഘടനകളെയും ഒരേകുടക്കീഴില്‍ അണിനിരത്തി സ്‌ഫോടനങ്ങള്‍ക്കും ലക്ഷ്യമിട്ടുള്ള കൊലപാതകങ്ങള്‍ക്കും ഈ ശൃംഖല വഴിയൊരുക്കി.

രാജ്യവ്യാപക പരിശോധനയും കേരളത്തിലെ സാന്നിധ്യവും കഴിഞ്ഞ സ്വാതന്ത്ര്യദിനത്തിന് മുന്നോടിയായി കേന്ദ്ര ഏജന്‍സികള്‍ നടത്തിയ ശക്തമായ നീക്കത്തില്‍ കേരളമടക്കം 14 സംസ്ഥാനങ്ങളില്‍ ഒരേസമയം റെയ്ഡ് നടന്നിരുന്നു. ഈ ഓപ്പറേഷനില്‍ നെറ്റ്വര്‍ക്കുമായി ബന്ധമുള്ള ഇരുനൂറിലധികം പേരെയാണ് സുരക്ഷാ സേന അറസ്റ്റ് ചെയ്തത്. ഗ്രനേഡുകള്‍, നിരീക്ഷണ ക്യാമറകള്‍ എന്നിവയുള്‍പ്പെടെയുള്ള ആയുധശേഖരങ്ങള്‍ ഇവര്‍ക്കിടയില്‍ നിന്ന് പിടിച്ചെടുത്തിരുന്നു. ഭീകരവാദവും സംഘടിത കുറ്റകൃത്യങ്ങളും കൈകോര്‍ക്കുന്ന പുതിയ മാതൃകയാണ് ഷഹ്സാദ് ഭട്ടി നെറ്റ്വര്‍ക്കിലൂടെ വെളിപ്പെട്ടിരിക്കുന്നത്. പുതിയ UAPA നിരോധനം വരുന്നതോടെ ഈ ശൃംഖലയുടെ സാമ്പത്തിക സ്രോതസ്സുകളും ആഗോള ബന്ധങ്ങളും പൂര്‍ണ്ണമായി തകര്‍ക്കാന്‍ അന്വേഷണ ഏജന്‍സികള്‍ക്ക് സാധിക്കുമെന്നാണ് വിലയിരുത്തപ്പെടുന്നത്.