ദൃശ്യം 3 ദി കൺക്ലൂഷൻ; ജീത്തു ജോസഫിന്റെ ക്ലാസിക്ക് ക്രിമിനൽ അവസാന ഭാഗത്തിലേക്ക്, ആകാംഷയോടെ പ്രേക്ഷകർ

മോഹൻലാൽ നായകനാകുന്ന ക്രൈം ത്രില്ലർ ചിത്രം ദൃശ്യം 3 പണിപ്പുരയിലാണെന്ന് സംവിധായകൻ ജീത്തു ജോസഫ് കഴിഞ്ഞ വർഷം പറഞ്ഞിരുന്നു. ഇപ്പോഴിതാ ചിത്രം ഉടൻ പ്രഖ്യാപിക്കുമെന്നാണ് ലഭിക്കുന്ന ഏറ്റവും പുതിയ റിപ്പോർട്ടുകൾ. 2021 ഫെബ്രുവരിയിൽ ദൃശ്യം 2 പുറത്തിറങ്ങിയതിന് ശേഷം ജീത്തു ജോസഫ്, മോഹൻലാലിനോടും നിർമ്മാതാവ് ആന്റണി പെരുമ്പാവൂരിനോടും ദൃശ്യം 3 യുടെ ക്ലൈമാക്സ് ചർച്ച ചെയ്തതായും അവർക്ക് അത് ഇഷ്ടപ്പെട്ടുവെന്നും വാർത്തകൾ വന്നിരുന്നു.

എന്നാൽ, ചിത്രം ഉടൻ തിയറ്ററുകളിലെത്തില്ലെന്ന് സംവിധായകൻ പറഞ്ഞു. നിലവിൽ ലഭിക്കുന്ന പുതിയ റിപ്പോർട്ടുകൾ അനുസരിച്ച്, ചിത്രം വരും ദിവസങ്ങളിൽ ഔദ്യോഗികമായി പ്രഖ്യാപിക്കുമെന്നാണ് കരുതപ്പെടുന്നത്. മോഹൻലാലിനെ നായകനാക്കി ഒരുക്കുന്ന പാൻഇന്ത്യൻ ചിത്രം റാമിന്റെ ചിത്രീകരണ തിരക്കുകളിലാണ് സംവിധായകൻ ജീത്തു. റാം രണ്ടു ഭാഗങ്ങൾ ഉള്ള സിനിമയാണെന്നും സംവിധായകൻ നേരത്തെ പ്രഖ്യാപിച്ചിരുന്നു.

ആദ്യ രണ്ട് ചിത്രങ്ങളിലെയും പോലെ മോഹൻലാൽ ജോർജ്കുട്ടിയായി തിരിച്ചെത്തും.
ബ്ലോക്ക്ബസ്റ്റർ ഫിലിം സീരീസിന്റെ അവസാന ഭാഗമായിരിക്കും ദൃശ്യം 3. ആദ്യഭാഗം 2013-ൽ പുറത്തിറങ്ങി, രണ്ടാം ഭാഗത്തിന്റെ കഥ ദൃശ്യം സംഭവങ്ങൾക്ക് ആറു വർഷത്തിനു ശേഷമാണ് ഇറക്കിയത്. ദൃശ്യം 2 ആദ്യം തിയറ്റർ റിലീസിനായി പ്ലാൻ ചെയ്തിരുന്നെങ്കിലും കോവിഡ് -19 പാൻഡെമിക് കാരണം നിർമ്മാതാക്കൾ ആമസോൺ പ്രൈം വീഡിയോ വഴി നേരിട്ട് ഡിജിറ്റൽ റിലീസ് ചെയ്യുകയായിരുന്നു.