കാൺപൂർ വാഹനാപകടം ; ട്രാക്ടർ ഡ്രൈവർ മദ്യപിച്ചിരുന്നതായി വെളിപ്പെടുത്തൽ ; പരിക്കേറ്റവരെ ആശുപത്രിയിൽ സന്ദർശിച്ച് മുഖ്യമന്ത്രി യോഗി ആദിത്യനാഥ്

ഉത്തർപ്രദേശ് : വാഹനാപകടത്തിൽപ്പെട്ട് 26 പേർ മരിച്ച സംഭവത്തിൽ ട്രാക്ടർ ഡ്രൈവർ മദ്യപിച്ചിരുന്നതായി വെളിപ്പെടുത്തൽ. വാഹനാപകടത്തിൽ നിന്നും രക്ഷപെട്ടവരാണ് ഇക്കാര്യം അറിയിച്ചത്. ഡ്രൈവർ മദ്യലഹരിയിൽ ആയിരുന്നുവെന്നും അമിത വേഗതയാണ് അപകടത്തിലേക്ക് നയിച്ചതെന്നും രക്ഷപെട്ടവർ ആരോപിച്ചു. അപകടത്തിൽ നിരവധി പേർക്ക് ഗുരുതരമായി പരിക്കേൽക്കുകയും ചെയ്തിരുന്നു.

അപകടം നടന്ന് അരമണിക്കൂറിനുശേഷമാണ് സഹായം ലഭിച്ചതെന്ന് രക്ഷപ്പെട്ടവർ പറഞ്ഞു. യാത്രക്കാരിൽ ചിലരെ നാട്ടുകാരാണ് രക്ഷപ്പെടുത്തിയത്. ഉത്തർപ്രദേശ് മുഖ്യമന്ത്രി യോഗി ആദിത്യനാഥ് പരിക്കേറ്റ് ചികിത്സയിൽ കഴിയുന്നവരെ ആശുപത്രിയിലെത്തി കണ്ടതായും അവർ പറഞ്ഞു. ചികിത്സയിൽ കഴിയുന്ന എല്ലാവരും അപകട നില തരണം ചെയ്തതായി യോഗി ആദിത്യനാഥ് പറഞ്ഞിരുന്നു.

സംഭവത്തെ ദൗർഭാഗ്യകരമെന്ന് വിശേഷിപ്പിച്ച മുഖ്യമന്ത്രി യോഗി, കേന്ദ്ര-സംസ്ഥാന സർക്കാരുകൾ മരിച്ചവരുടെ കുടുംബത്തിനൊപ്പമുണ്ടെന്ന് പറഞ്ഞു. യാത്രക്കാർക്കായി ട്രാക്ടർ ട്രോളി ഉപയോഗിക്കരുതെന്ന് ഗതാഗത വകുപ്പ് ഉദ്യോഗസ്ഥർക്ക് കർശന നിർദേശം നൽകിയിട്ടുണ്ടെന്നും അദ്ദേഹം കൂട്ടിച്ചേർത്തു. വിഷയത്തിൽ ബോധവൽക്കരണ പരിപാടിയും നടത്തുമെന്നും യോഗി ആദിത്യനാഥ് പറഞ്ഞു.