ഡ്രൈവിങ് ടെസ്റ്റ് പരിഷ്‌കാരം മേയ് മുതൽ ! പരിഷ്കരിച്ച സൗകര്യങ്ങളൊരുക്കാൻ മൂന്നുമുതല്‍ അഞ്ചുവരെ ലക്ഷംരൂപ ചെലവാകുമെന്ന് ഡ്രൈവിങ് സ്‌കൂള്‍ ഉടമകൾ ! സൗകര്യങ്ങൾ ആര് ഒരുക്കും എന്നതിൽ അവ്യക്തത !

ഡ്രൈവിങ് ടെസ്റ്റ് പരിഷ്‌കാരം മോട്ടോര്‍ വാഹനവകുപ്പ് വരുന്ന മേയ് മാസം മുതല്‍ നടപ്പിൽ വരുമെന്ന് സൂചന. എന്നാൽ പുതിയ പരിഷ്കാരത്തിൽ കയറ്റവും ഇറക്കവും റിവേഴ്‌സ് പാര്‍ക്കിങ്ങുമൊക്കെയുള്ള മാതൃകയാണ് ഒരുക്കിയിരിക്കുന്നത്. സമാന്തര പാര്‍ക്കിങ്, ആംഗുലാര്‍ പാര്‍ക്കിങ് തുടങ്ങിയവയുമുണ്ട്. അതിനാൽ തന്നെ ഇതനുസരിച്ചുള്ള പരിശോധനാകേന്ദ്രങ്ങള്‍കൂടി ഒരുക്കേണ്ടതുണ്ട്. എന്നാല്‍, ഡ്രൈവിങ് സ്‌കൂള്‍ ഉടമകളാണോ സര്‍ക്കാരാണോ ഇവ ഒരുക്കേണ്ടതെന്ന കാര്യത്തില്‍ അവ്യക്തത തുടരുകയാണ്.

ഇപ്പോൾ നിലവിലുള്ള ‘എച്ച്’ രീതി ഏത് മൈതാനത്തും എടുപ്പിക്കാം. എന്നാല്‍, പരിഷ്‌കരിച്ച രീതി നടപ്പിലാക്കുമ്പോൾ കൂടുതൽ സൗകര്യങ്ങള്‍ വേണം. ഇതൊരുക്കാന്‍ മൂന്നുമുതല്‍ അഞ്ചുവരെ ലക്ഷംരൂപ ചെലവാകുമെന്നു ഡ്രൈവിങ് സ്‌കൂള്‍ ഉടമകള്‍ പറയുന്നു.ഇതു വിശദീകരിക്കാനായി ഡ്രൈവിങ് സ്‌കൂള്‍ ഉടമകളുടെ യോഗം കഴിഞ്ഞദിവസം വിളിച്ചിരുന്നു. പുതിയരീതി ഉടന്‍ നടപ്പാക്കുമെന്നും അറിയിച്ചു. പരിശോധനാകേന്ദ്രങ്ങള്‍ ഒരുക്കണമെന്നു സ്‌കൂളുകാരോട് നിര്‍ദേശിച്ചിരുന്നു. ചിലര്‍ സമ്മതിച്ചെങ്കിലും ചെലവോര്‍ത്ത് അവരിപ്പോള്‍ ആശങ്കയിലാണ്.

സംസ്ഥാനത്ത് നിലവിൽ 86 ഡ്രൈവിങ് പരിശോധനാ കേന്ദ്രങ്ങളാണുള്ളത്. ഇതില്‍ പത്തെണ്ണമേ മോട്ടോര്‍വാഹന വകുപ്പിന്റേതായുള്ളൂ. മറ്റിടങ്ങളില്‍ പൊതുസ്ഥലങ്ങളാണ് ഉപയോഗിക്കുന്നത്. ഇവിടെ സ്ഥിരം സംവിധാനമൊരുക്കുക എന്നത് അപ്രായോഗികമാണ് എന്നാണ് വിലയിരുത്തൽ !