ഷിരൂരിൽ ഉപയോഗിച്ച ഡ്രോണുകൾ വയനാട്ടിലേക്ക് !മൃതദേഹങ്ങൾക്കായി അത്യാധുനിക സാങ്കേതികവിദ്യ ഉപയോഗിച്ചുള്ള പരിശോധന നാളെ മുതൽ !

കൽപ്പറ്റ : വയനാട്ടിലെ ഉരുള്‍പൊട്ടല്‍ ദുരന്തമുഖത്ത് നാളെ മുതൽ ഡ്രോണുകളടക്കമുള്ളവ ഉപയോഗിച്ചുള്ള തെരച്ചിൽ ആരംഭിക്കും. നൂറുകണക്കിന് മൃതദേഹങ്ങള്‍ ഇനിയും മണ്ണിനടിയിൽ നിന്ന് കണ്ടെത്താനുള്ള സാഹചര്യത്തിലാണ് ഡ്രോണിന്റെ മറ്റു സാങ്കേതിക വിദ്യകളുടേയും സഹായം അധികൃതര്‍ തേടിയത്. ഷിരൂര്‍ ദുരന്തത്തില്‍ രക്ഷാപ്രവര്‍ത്തനത്തിന് ഉപയോഗിച്ച ഡ്രോണ്‍ വയനാട്ടിലെത്തിക്കാന്‍ തീരുമാനിച്ചിട്ടുണ്ട്. തെര്‍മല്‍ സ്‌കാനിങും നടത്തും. മൃതദേഹങ്ങൾ അഴുകാനുള്ള സാധ്യത പരിഗണിച്ച് ഇവ വളരെ വേഗത്തിൽ വീണ്ടെടുക്കേണ്ടത് അത്യാവശ്യമാണ്. ഉരുൾപ്പൊട്ടൽ തകർത്തെറിഞ്ഞ മുണ്ടൈക്കൈയില്‍ ജീവനോടെ ആരും അവശേഷിക്കുന്നില്ല എന്നാണ് നിഗമനം.

റിട്ട.മേജര്‍ ജനറല്‍ ഇന്ദ്രബാലന്റെ സംഘത്തിന്റെ സഹായവും സംസ്ഥാന സര്‍ക്കാര്‍ തേടിയിരുന്നു. അദ്ദേഹത്തിന്റെ നേതൃത്വത്തിലാകും മണ്ണിനടയിലുള്ളവരെ കണ്ടെത്താന്‍ ഐബോഡ് ഉപയോഗിക്കുക. ഷിരൂരിലും അദ്ദേഹത്തിന്റെ ഈ നേതൃത്വത്തില്‍ ഈ സാങ്കേതികവിദ്യ ഉപയോഗിച്ചിരുന്നു.ഉരുള്‍പ്പൊട്ടിയ പ്രദേശത്തെ ഏരിയ മാപ്പിങും തയ്യാറാക്കുന്നുണ്ട്.