മ്യാന്‍മർ, തായ്ലന്‍ഡ് ഭൂകമ്പം !! സാധ്യമായ എല്ലാ സഹായവും നൽകാൻ ഭാരതം തയ്യാറാണെന്ന് പ്രധാനമന്ത്രി നരേന്ദ്രമോദി ; സര്‍ക്കാരുകളുമായി ബന്ധപ്പെടാൻ വിദേശകാര്യ മന്ത്രാലയത്തിന് നിർദ്ദേശം

ദില്ലി : മ്യാന്‍മറിലും തായ്ലന്‍ഡിലുമുണ്ടായ ശക്തമായ ഭൂചലനത്തില്‍ രക്ഷാപ്രവർത്തനത്തിനടക്കം സഹായം വാഗ്ദാനം ചെയ്ത് പ്രധാനമന്ത്രി നരേന്ദ്രമോദി. കനത്ത നാശനഷ്ടങ്ങളിൽ ആശങ്ക പങ്കുവച്ച പ്രധാനമന്ത്രി സാധ്യമായ എല്ലാ സഹായവും നല്‍കാന്‍ ഭാരതം തയ്യാറാണെന്നും വ്യക്തമാക്കി.

‘മ്യന്‍മാറിലും തായ്ലന്‍ഡിലും ഉണ്ടായ ഭൂകമ്പത്തെത്തുടര്‍ന്നുള്ള സ്ഥിതിഗതികളില്‍ ആശങ്കയുണ്ട്. എല്ലാവരുടെയും സുരക്ഷയ്ക്കും ക്ഷേമത്തിനും വേണ്ടി പ്രാര്‍ത്ഥിക്കുന്നു. സാധ്യമായ എല്ലാ സഹായവും നല്‍കാന്‍ ഭാരതംതയ്യാറാണ്. മ്യാന്‍മറിലും തായ്ലന്‍ഡിലും സര്‍ക്കാരുകളുമായി ബന്ധപ്പെടാൻ വിദേശകാര്യ മന്ത്രാലയത്തോട് ആവശ്യപ്പെട്ടു,’ അദ്ദേഹം കുറിച്ചു.

മ്യാന്‍മാറില്‍ റിക്ടര്‍ സ്‌കെയിലില്‍ 7.7 ഉം 6.4 ഉം രേഖപ്പെടുത്തിയ രണ്ട് ഭൂചലനങ്ങളാണ് ഉണ്ടായത്. തലസ്ഥാനമായ നയ്പിഡോവില്‍ റോഡുകള്‍ പിളര്‍ന്നു. . തായ്ലന്‍ഡിലും മേഖലയിലെ മറ്റിടങ്ങളിലും ഭൂകമ്പത്തിന്റെ പ്രകമ്പനം അനുഭവപ്പെട്ടു.തായ്ലന്‍ഡ് തലസ്ഥാനമായ ബാങ്കോക്കിലെ കെട്ടിടം തകര്‍ന്ന് 43 പേര്‍ കുടുങ്ങിയതായാണ് വിവരം. ബാങ്കോക്കില്‍ അടിയന്തരാവസ്ഥ പ്രഖ്യാപിച്ചിട്ടുണ്ട്.