കേരളത്തിൽ വൈദ്യുതി പ്രതിസന്ധി രൂക്ഷം; കെഎസ്‍ഇബി ഓഫീസുകളിൽ പ്രതിഷേധം ശക്തം

കടുത്ത വേനൽച്ചൂടിന് പിന്നാലെ കേരളം വലിയൊരു വൈദ്യുതി പ്രതിസന്ധിയിലേക്കാണ് നീങ്ങുന്നത്. സംസ്ഥാനത്തിന്റെ വിവിധ ഭാഗങ്ങളിൽ വൈകുന്നേരങ്ങളിലും രാത്രികളിലും വൈദ്യുതി തടസ്സം പതിവായതോടെ ജനങ്ങൾ പ്രതിഷേധവുമായി തെരുവിലിറങ്ങിയിരിക്കുകയാണ്. പലയിടത്തും കെഎസ്ഇബി ഓഫീസുകൾ ഉപരോധിക്കുന്ന സാഹചര്യമുണ്ടായി. എന്നാൽ, സംസ്ഥാനത്ത് അപ്രഖ്യാപിത ലോഡ് ഷെഡിങ് ഇല്ലെന്നും, നിലവിലെ പ്രശ്നങ്ങൾ രണ്ട് ദിവസത്തിനുള്ളിൽ പരിഹരിക്കുമെന്നുമാണ് വൈദ്യുതി മന്ത്രി കെ. കൃഷ്ണൻകുട്ടി വ്യക്തമാക്കിയത്. അമിതമായി വൈദ്യുതി ഉപയോഗിക്കുന്നത് ഒഴിവാക്കി ജനങ്ങൾ സ്വയം നിയന്ത്രണം പാലിക്കണമെന്നും അദ്ദേഹം ആവശ്യപ്പെട്ടു.

സർക്കാർ അപ്രഖ്യാപിത ലോഡ് ഷെഡിങ് ഇല്ലെന്ന് ആവർത്തിക്കുമ്പോഴും, വൈകുന്നേരങ്ങളിലും രാത്രികളിലും വൈദ്യുതി മുടങ്ങുന്നത് ജനജീവിതത്തെ ദുസ്സഹമാക്കുന്നു. ചൂടുകാലത്ത് വൈദ്യുതി കൂടി മുടങ്ങുന്നതോടെ കടുത്ത ദുരിതമാണ് അനുഭവിക്കുന്നത്. ഇതിൽ പ്രതിഷേധിച്ചു പലയിടങ്ങളിലും ജനങ്ങൾ കെഎസ്ഇബി ഓഫീസുകൾക്ക് മുന്നിലെത്തി. അമ്പലപ്പുഴയിൽ അർദ്ധരാത്രി മുതൽ പുലർച്ചെ വരെ നാട്ടുകാർ പ്രതിഷേധിച്ചു. തൊടുപുഴയിൽ കെഎസ്ഇബി ഓഫീസിൽ യൂത്ത് കോൺഗ്രസ് പ്രവർത്തകർ പായ വിരിച്ചും, കണ്ണൂരിൽ വൈദ്യുതി ഭവന് മുന്നിൽ മെഴുകുതിരി നൽകിയും പ്രതിഷേധം രേഖപ്പെടുത്തി.

ലോഡ് കൂടുമ്പോൾ വൈദ്യുതി മുടങ്ങുന്നത് സ്വാഭാവികമാണെന്നാണ് മന്ത്രിയുടെ നിലപാട്. റെഗുലേറ്ററി കമ്മീഷന്റെ അനുമതിയോടെ പുറത്തുനിന്നും കൂടുതൽ വില നൽകി വൈദ്യുതി വാങ്ങുക എന്നതാണ് നിലവിലെ സാഹചര്യത്തിൽ ഏക പോംവഴി. എന്നാൽ, ഇത് ഭാവിയിൽ വൈദ്യുതി ബില്ലിൽ വലിയ വർദ്ധനവിന് കാരണമാകുമോ എന്ന ആശങ്ക ഉപഭോക്താക്കൾക്കുണ്ട്. ‘പവർകട്ടില്ലാത്ത പത്ത് വർഷങ്ങൾ’ എന്ന സർക്കാർ വാഗ്ദാനത്തിനെതിരെ സോഷ്യൽ മീഡിയയിൽ വലിയ വിമർശനമാണ് ഉയരുന്നത്. ചൂട് വർധിച്ചതും മഴയില്ലാത്തതുമാണ് വൈദ്യുതി ഉപഭോഗം കൂടാനും ഉൽപാദനം കുറയാനും കാരണമായതെന്നും, ഈ സാഹചര്യത്തിൽ വിമർശകർ പ്രകൃതിയോട് ചോദിക്കണമെന്നുമാണ് മന്ത്രി ഇതിന് മറുപടിയായി പറഞ്ഞത്.