ശത്രുക്കൾക്ക് ഇനി പേടി സ്വപ്നം; ഇന്ത്യ തദ്ദേശീയമായി നിർമ്മിച്ച ലൈറ്റ് കോംബാറ്റ് ഹെലികോപറ്റർ എത്തുന്നു, ഇന്ന് മുതൽ വ്യോമസനേയുടെ ഭാഗമാകും

ജോധ്പൂർ: ഇന്ത്യ തദ്ദേശീയമായി നിർമ്മിച്ച ശത്രുവിന്റെ വ്യോമ പ്രതിരോധത്തെ തകർക്കാനും കലാപത്തെ ചെറുക്കാനും മറ്റ് പലതിനും കഴിവുള്ള ലൈറ്റ് കോംബാറ്റ് ഹെലികോപ്റ്റർ (എൽസിഎച്ച്) ഇന്ന് ജോധ്പൂർ എയർ ബേസിൽ ഇന്ത്യൻ വ്യോമസേനയിൽ ഔദ്യോഗികമായി ഉൾപ്പെടുത്തും. ലൈറ്റ് കോംബാറ്റ് ഹെലികോപ്റ്ററിന്റെ ആദ്യ ബാച്ച് ഇന്ന് വ്യോമസേനയ്‌ക്ക് കൈമാറും. രാജസ്ഥാനിലെ ജോധ്പൂരിൽ നടക്കുന്ന ചടങ്ങിൽ കേന്ദ്ര പ്രതിരോധമന്ത്രി രാജ്‌നാഥ് സിംഗ് മുഖ്യാതിഥിയാകും. പുതിയ ലൈറ്റ് കോംബാറ്റ് ഹെലികോപ്റ്ററുകൾ വ്യോമസേനയുടെ പോരാട്ട വീര്യത്തിന് കരുത്ത് പകരുമെന്ന് അദ്ദേഹം ട്വിറ്ററിൽ കുറിച്ചു. രാജ്‌നാഥ് സിംഗിന് പുറമെ വ്യോമസേനാ മേധാവി വി.ആർ.ചൗധരിയും ചടങ്ങിൽ പങ്കെടുക്കും.

ഹിന്ദുസ്ഥാൻ എയറോനോട്ടിക്‌സ് ലിമിറ്റഡാണ് ഹെലികോപ്റ്റർ നിർമ്മിച്ചിരിക്കുന്നത്. നിർമ്മാതാക്കൾ പറയുന്നതനുസരിച്ച്, ഇന്ത്യൻ സായുധ സേനയുടെ നിർദ്ദിഷ്ട ആവശ്യകതകൾ നിറവേറ്റുന്ന, ഗണ്യമായ ആയുധങ്ങളും ഇന്ധനവുമായി 5,000 മീറ്റർ ഉയരത്തിൽ സുഗമമായി പറക്കാനും ലാൻഡ് ചെയ്യാനും ടേക്ക് ഓഫ് ചെയ്യാനും കഴിയുന്ന ലോകത്തിലെ ഒരേയൊരു ആക്രമണ ഹെലികോപ്റ്ററാണ് എൽസിഎച്ച്.

കഴിഞ്ഞ മാർച്ചിലാണ് പ്രധാനമന്ത്രി നരേന്ദ്രമോദിയുടെ നേതൃത്വത്തിലുള്ള സുരക്ഷാ കാബിനറ്റ് കമ്മിറ്റി ലൈറ്റ് കോംബാറ്റ് ഹെലികോപ്റ്ററുകൾ നിർമ്മിക്കുന്നതിനുള്ള അംഗീകാരം നൽകിയത്. 15 ഹെലികോപ്റ്ററുകളുടെ നിർമ്മാണത്തിനായി 3887 കോടിയാണ് നീക്കി വച്ചിരിക്കുന്നത്. വ്യോമസേനയ്‌ക്ക് പുറമെ സൈന്യത്തിനും അഞ്ച് ഹെലികോപ്റ്ററുകൾ കൈമാറും.