ഇ പി ജയരാജൻ വിമാനത്തിനുള്ളിൽ മർദ്ദിച്ചെന്ന കേസ് ! യൂത്ത് കോൺഗ്രസ് പരാതിയിൽ എസ്ഐടി അന്വേഷണം

തിരുവനന്തപുരം : ഇൻഡിഗോ വിമാനത്തിൽ നടന്ന പ്രതിഷേധത്തിനിടെ യൂത്ത് കോൺഗ്രസ് പ്രവർത്തകരെ സിപിഎം നേതാവ് ഇ.പി. ജയരാജൻ മർദ്ദിച്ചെന്ന പരാതി പ്രത്യേക അന്വേഷണ സംഘം അന്വേഷിക്കുമെന്ന് ആഭ്യന്തര വകുപ്പ് മന്ത്രി രമേശ് ചെന്നിത്തല . കേസിൽ ഇ.പി. ജയരാജനെ കുറ്റവിമുക്തനാക്കി മുൻ സർക്കാർ സമർപ്പിച്ച പോലീസ് റിപ്പോർട്ട് തിരുവനന്തപുരം ജുഡീഷ്യൽ ഫസ്റ്റ് ക്ലാസ് മജിസ്‌ട്രേറ്റ് കോടതി കഴിഞ്ഞ ദിവസം തള്ളിയിരുന്നു. ഈ സാഹചര്യത്തിലാണ് ഒരു അസിസ്റ്റന്റ് കമ്മീഷണറുടെ നേതൃത്വത്തിൽ പ്രത്യേക സംഘത്തെ നിയോഗിച്ച് തുടരന്വേഷണം നടത്താൻ ആഭ്യന്തര വകുപ്പ് തീരുമാനിച്ചത്.

സംസ്ഥാനത്തെ ആഭ്യന്തര സുരക്ഷയും ക്രമസാമാധാന പരിപാലനവും കൂടുതൽ ശക്തമാക്കുന്നതിന്റെ ഭാഗമായി ആയിരം ഹോം ഗാർഡുമാരെ ഉടൻ നിയമിക്കുമെന്നും മന്ത്രി പ്രഖ്യാപിച്ചു. മാറുന്ന കാലാവസ്ഥയും അത്യാഹിതങ്ങളും നേരിടാൻ തക്കവണ്ണം പോലീസ്, ഫയർഫോഴ്സ് സേനകളിൽ ആധുനിക പരിഷ്‌കാരങ്ങൾ കൊണ്ടുവരും. ഇതിന്റെ ഭാഗമായി ഉയർന്ന കെട്ടിടങ്ങളിലെ തീപിടുത്തങ്ങൾ പ്രതിരോധിക്കാൻ ആവശ്യമായ അത്യാധുനിക സ്കൈ ലിഫ്റ്റുകൾ ഉടൻ വാങ്ങും. റസിഡൻസ് അസോസിയേഷനുകളുടെ സഹായത്തോടെ ജനങ്ങൾക്കായി സെൽഫ് ഡിഫൻസ് (ആത്മരക്ഷാ) സംവിധാനങ്ങൾ നടപ്പിലാക്കുമെന്നും കുട്ടികൾക്ക് നീന്തൽ പരിശീലനം നിർബന്ധമാക്കുമെന്നും അദ്ദേഹം കൂട്ടിച്ചേർത്തു.

ശരീരസൗന്ദര്യ മത്സര വിജയികൾക്ക് നിയമന മാനദണ്ഡങ്ങൾ ലംഘിച്ച് പോലീസിൽ ജോലി നൽകിയെന്ന പരാതിയിൽ സംസ്ഥാന പോലീസ് മേധാവിയോട് അടിയന്തര റിപ്പോർട്ട് ആവശ്യപ്പെട്ടിട്ടുണ്ടെന്ന് മന്ത്രി ചെന്നിത്തല വ്യക്തമാക്കി. അർഹതയില്ലാത്ത ആർക്കും തന്നെ നിയമനം നൽകില്ലെന്നാണ് സർക്കാരിന്റെ ഉറച്ച തീരുമാനമെന്നും ക്രമക്കേടുകൾ കണ്ടെത്തിയാൽ കർശന നടപടിയുണ്ടാകുമെന്നും ആഭ്യന്തര മന്ത്രി വാർത്താ സമ്മേളനത്തിൽ കൂട്ടിച്ചേർത്തു.