കൊല്ലം : നടനും എംഎൽഎയുമായ മുകേഷിന്റെ രാജി ആവശ്യപ്പെട്ട് കോഴിയുമായി റോഡ് ഉപരോധിച്ച് യുവമോർച്ച പ്രവർത്തകർ. കൊല്ലം ചിന്നക്കടയിലാണ് റോഡ് ഉപരോധിച്ച് യുവമോർച്ച പ്രവർത്തകർ പ്രതിഷേധം നടത്തിയത്. ഹേമ കമ്മിറ്റി റിപ്പോർട്ട് പുറത്തുവന്നതിന് പിന്നാലെ മുകേഷിനെതിരെ ഉയർന്നുവന്ന ആരോപണങ്ങളുടെ പശ്ചാത്തലത്തിലാണ് യുവമോർച്ച പ്രവർത്തകർ പ്രതിഷേധം.
അതേസമയം, മുകേഷിന്റെ രാജി ആവശ്യപ്പെട്ട് വിവിധ സംഘടനകളാണ് രംഗത്തെത്തിയിരിക്കുന്നത്. സംസ്ഥാനമൊട്ടാകെ പ്രതിഷേധം കനക്കുകയാണ്. കഴിഞ്ഞദിവസം മുകേഷിന്റെ കോലത്തിൽ ചെരുപ്പുമാലയിട്ട് എബിവിപി പ്രതിഷേധം സംഘടിപ്പിച്ചിരുന്നു. അതിനിടയിൽ കുറ്റാരോപിതനെ സംരക്ഷിക്കുന്ന സർക്കാരിന്റെ നിലപാട് ശരിയല്ലെന്നും മുകേഷ് രാജി വയ്ക്കണമെന്നാവശ്യപ്പെട്ട് സിപിഐ നേതാവ് ആനി രാജ തന്നെ രംഗത്തെത്തിയതോടെ ഇടതുമുന്നണി രണ്ടുതട്ടിൽ ആയിരിക്കുകയാണ്. എന്നാൽ പീഡനത്തിന് കേസെടുത്തെങ്കിലും മുകേഷ് രാജി വയ്ക്കേണ്ടതില്ലെന്നാണ് എൽഡിഎഫ് കൺവീനർ ഇ.പി ജയരാജൻ പറഞ്ഞത്. രണ്ട് കോൺഗ്രസ് എംഎൽഎമാർക്കെതിരെ ലൈംഗികാരോപണങ്ങൾ ഉയർന്നപ്പോൾ അവർ രാജിവച്ചിരുന്നില്ലെന്നാണ് ഇ.പി ജയരാജന്റെ വാദം.
