വീടിന് തീപിടിച്ച് മുൻ ഐപിഎസ് ഉദ്യോഗസ്ഥൻ ദിനേശ് ചന്ദ്ര പാണ്ഡയ്ക്ക് ദാരുണാന്ത്യം; ഭാര്യയും മകനും ഗുരുതരാവസ്ഥയിൽ

ലഖ്നൗ; വീടിന് തീപിടിച്ച് മുൻ ഐപിഎസ് ഉദ്യോഗസ്ഥൻ ദിനേശ് ചന്ദ്ര പാണ്ഡയ്ക്ക് ദാരുണാന്ത്യം. ലക്‌നൗവിലെ ഇന്ദിരാനഗറിലെ വീട്ടിലുണ്ടായ തീപിടുത്തത്തിൽപ്പെട്ടാണ് മരണം. ഭാര്യയും മകനും ആശുപത്രിയിൽ ഗുരുതരാവസ്ഥയിൽ തുടരുകയാണ്. വീട്ടിൽ തീ പടരുന്നത് കണ്ട് ദിനേശ് ചന്ദ്ര പാണ്ഡെയും ഭാര്യ അരുണയും മകൻ ശശാങ്കും വീടിന് പുറത്തിറങ്ങാൻ ശ്രമിച്ചെങ്കിലും സാധിച്ചില്ല.

വിവരമറിഞ്ഞ് ഇന്ദിരാനഗർ ഫയർഫോഴ്‌സും പോലീസും സ്ഥലത്തെത്തി. എല്ലായിടത്തും പുക പടർന്നതിനാൽ രക്ഷാപ്രവർത്തനം പ്രയാസമായിരുന്നു . ഓക്സിജൻ മാസ്‌ക്കുകൾ ധരിച്ച പത്തംഗ സംഘം വീടിന്റെ ഒന്നാം നിലയിൽ എത്തി കെട്ടിടത്തിനുള്ളിൽ കുടുങ്ങിയ മറ്റുള്ളവരെ പുറത്തെടുത്തു. ദിനേശ് പാണ്ഡെയും കുടുംബവും അബോധാവസ്ഥയിലായിരുന്നു.ഉടൻ തന്നെ ഇവരെ അടുത്തുള്ള ആശുപത്രിയിൽ പ്രവേശിപ്പിച്ചു. എന്നാൽ ദിനേശ് പാണ്ഡെ മരണത്തിന് കീഴടങ്ങുകയായിരുന്നു. തീപിടിത്തത്തിന് കാരണം എന്താണെന്ന് കണ്ടെത്താൻ ഉന്നത പോലീസ് ഉദ്യോഗസ്ഥർ അന്വേഷണം ആരംഭിച്ചു.