രണ്ടാം ദിന ആക്രമണത്തിൽ പകച്ച് യുക്രെയ്ൻ; കീവിൽ വീണ്ടും ആറിടത്ത് ഉഗ്രസ്ഫോടനം

കീവ്: രണ്ടാം ദിന ആക്രമണത്തിന് തുടക്കമിട്ട് റഷ്യ. കീവിൽ ആറിടത്ത് ഉഗ്രസ്ഫോടനം(Blast In Kiev). ശക്തമായ ആക്രമണമാണ് ഇന്നും റഷ്യ നടത്തിക്കൊണ്ടിരിക്കുന്നത്. അന്താരാഷ്ട്ര മാധ്യമങ്ങളാണ് ഇതുസംബന്ധിച്ച വിവരം പുറത്തുവിട്ടത്. അതേസമയം എത്രയും വേഗം കീവ് കീഴടക്കി യുക്രെയ്ൻ പിടിച്ചെടുക്കുക എന്നതാണ് റഷ്യയുടെ ലക്‌ഷ്യം. കഴിഞ്ഞദിവസവും യുദ്ധം ആരംഭിച്ചത് കീവിൽ സ്ഫോടനങ്ങൾ നടത്തിക്കൊണ്ടായിരുന്നു. സമാനമായ രീതിയിലാണ് ഇന്നും ആക്രമണത്തിന് തുടക്കമിട്ടത്.

അതേസമയം കഴിഞ്ഞ ദിവസം രാത്രിയും ആക്രമണങ്ങൾ ശക്തമായിരുന്നു. 137 ലധികം സാധാരണക്കാരാണ് യുദ്ധത്തിന്റെ ആദ്യ ദിവസമായ ഇന്നലെ മാത്രം കൊല്ലപ്പെട്ടത്. യുക്രെയ്ൻ പ്രസിഡന്റ് വ്ളോഡിമർ സെലെൻസ്‌കിയാണ് ഇക്കാര്യം വ്യക്തമാക്കിയത്. സൈനികരും സാധാരണക്കാരും ഉൾപ്പെടെയുള്ളവരുടെ കണക്കാണിത്. നൂറുക്കണക്കിന് പേർക്ക് പരിക്കേറ്റതായും അദ്ദേഹം വ്യക്തമാക്കി. ഇന്ന് പുലർച്ചയോടെ പുറത്തുവിട്ട വീഡിയോ സന്ദേശത്തിലാണ് യുക്രെയ്ൻ പ്രസിഡന്റ് ഇക്കാര്യം സ്ഥിരീകരിച്ചത്.