കൊടും ദാരിദ്ര്യം ! ഒഡീഷയിൽ പെൺകുഞ്ഞിനെ 800 രൂപയ്‌ക്ക് വിറ്റ് മാതാവ്

ഒഡീഷ : കടുത്ത ദാരിദ്ര്യത്തെ തുടർന്ന് തന്റെ രണ്ടാമത്തെ പ്രസവത്തിലുണ്ടായ പെൺകുട്ടിയെ 800 രൂപയ്‌ക്ക് വിറ്റ് ഗോത്ര യുവതി. തമിഴ്‌നാട്ടിൽ ജോലിക്ക് പൊയ്ക്കിരുന്ന കുട്ടിയുടെ പിതാവറിയാതെയായിരുന്നു വിൽപ്പന. ഒഡീഷയിലെ മായുർബഞ്ച് ജില്ലയിലാണ് ഞെട്ടിക്കുന്ന സംഭവം റിപ്പോർട്ട് ചെയ്തിരിക്കുന്നത്. കരാമി മുർമു എന്ന ഗോത്രയുവതിയാണ് തന്റെ എട്ടുമാസം പ്രായമുള്ള പെൺകുട്ടിയെ 800 രൂപയ്‌ക്കു വിറ്റത്. സംഭവത്തിൽ ഇവരെയും കുട്ടിയെ വാങ്ങിയ ഫുലാമണി, അഖിൽ മർനാഡി എന്ന ദമ്പതിമാരെയും പൊലീസ് അറസ്റ്റു ചെയ്തു. നിലവിൽ കുട്ടിയെ ശിശുസംരക്ഷണ കേന്ദ്രത്തിൽ പാര്‍പ്പിച്ചിരിക്കുകയാണ്.

തമിഴ് നാട്ടിൽ കൂലിവേല ചെയ്യുകയായിരുന്ന പിതാവ് തിരികെയെത്തിയപ്പോൾ കുട്ടി മരിച്ചു എന്നാണു പറഞ്ഞത്. എന്നാൽ അയൽവാസികൾ നൽകിയ വിവരങ്ങളുടെ അടിസ്ഥാനത്തിൽ ഇയാൾ പൊലീസിൽ പരാതി നൽകുകയായിരുന്നു. കടുത്ത ദാരിദ്ര്യത്തിൽ എങ്ങനെ പെൺകുട്ടിയെ വളർത്തുമെന്ന ആശങ്ക മൂലമാണ് അയൽവാസിയുടെ സഹായത്തോടെ ഇവർ കുഞ്ഞിനെ വിറ്റതെന്നാണ് വിവരം. ഒരു ദിവസം കുഞ്ഞുമായി ചന്തയിലേക്കു പോയ ഇവരെ ഗ്രാമീണർ ശ്രദ്ധിച്ചിരുന്നു. എന്നാൽ ഇവർ മടങ്ങിയെത്തിയപ്പോൾ കുട്ടി ഇവരുടെ പക്കലുണ്ടായിരുന്നില്ല.തിരക്കിയപ്പോൾ മരിച്ചുവെന്നായിരുന്നു മറുപടി.