വസ്തുതാപരമായ പിഴവ് !!’അണലി ലഹരി’ പരാമർശം തിരുത്തി ആഭ്യന്തരമന്ത്രി രമേശ് ചെന്നിത്തല; ഡോക്ടറുടെ തിരുത്ത് സ്വീകരിക്കുന്നതായി വിശദീകരണം

തിരുവനന്തപുരം : ലഹരിക്കായി അണലിക്കുഞ്ഞുങ്ങളെക്കൊണ്ട് നാവിൽ കൊത്തിക്കുന്ന ലഹരി പാർലറുകൾ സംസ്ഥാനത്തുണ്ടെന്ന തന്റെ പരാമർശം തിരുത്തി ആഭ്യന്തരമന്ത്രി രമേശ് ചെന്നിത്തല. അപകടകരമായ വിവിധതരം ലഹരി ഉപയോഗങ്ങളെക്കുറിച്ചുള്ള സംഭാഷണത്തിനിടയിൽ സംഭവിച്ച വസ്തുതാപരമായ പിഴവാണിതെന്നും ഡോ. ഷിംന അസീസിന്റെ തിരുത്ത് മാദ്ധ്യമങ്ങളിലൂടെ ശ്രദ്ധയിൽപ്പെട്ടതിനെത്തുടർന്നാണ് ഇത് വ്യക്തമാക്കുന്നതെന്നും അദ്ദേഹം പറഞ്ഞു. അണലിക്കുഞ്ഞുങ്ങളെയാണ് ഇതിനായി ഉപയോഗിക്കുന്നതെന്ന് താൻ പറഞ്ഞത് ശരിയല്ലെന്ന് സമ്മതിച്ച മന്ത്രി, ഡോക്ടറുടെ തിരുത്ത് പൂർണ്ണമനസ്സോടെ സ്വീകരിക്കുന്നതായും അറിയിച്ചു.

ലഹരിക്കെതിരായ പോരാട്ടം വ്യക്തിജീവിതത്തിലും പൊതുപ്രവർത്തനത്തിലും ഏറെക്കാലമായി മുന്നോട്ട് കൊണ്ടുപോകുന്ന ഒന്നാണെന്നും പ്രസംഗങ്ങളിലും അഭിമുഖങ്ങളിലും ഇതിനെതിരെ നിരന്തരം സംസാരിക്കാറുണ്ടെന്നും ചെന്നിത്തല തന്റെ ഫേസ്ബുക്ക് കുറിപ്പിൽ വ്യക്തമാക്കി. യുഡിഎഫ് അധികാരത്തിൽ വന്നാൽ ലഹരിയുടെ വേരറുക്കുമെന്ന പ്രഖ്യാപനം നടപ്പാക്കിക്കൊണ്ട് ആരംഭിച്ച ‘തൂഫാൻ’ നാർക്കോട്ടിക് വേട്ടയിൽ അഭിമാനമുണ്ടെന്നും അദ്ദേഹം കൂട്ടിച്ചേർത്തു. ഇതോടൊപ്പം ‘തൂഫാൻ വാരിയർ’ ആകാൻ ഡോ. ഷിംന അസീസിനെ അദ്ദേഹം ഹൃദയപൂർവ്വം ക്ഷണിക്കുകയും ചെയ്തു.

പാമ്പുകളെ ഉപയോഗിച്ചുള്ള മാരകമായ ലഹരി ഉപയോഗങ്ങൾ നിലനിൽക്കുന്നുണ്ടെന്നത് ഞെട്ടിപ്പിക്കുന്ന വിവരമാണെന്നും കേരളത്തിലും ഇത്തരം കേന്ദ്രങ്ങൾ ഉണ്ടെന്ന വിവരങ്ങളെ ഗൗരവത്തോടെയാണ് ആഭ്യന്തര വകുപ്പ് കാണുന്നതെന്നും മന്ത്രി വ്യക്തമാക്കി. ഇത്തരത്തിലുള്ള യഥാർത്ഥ വിവരങ്ങൾ അധികൃതരെ അറിയിക്കാൻ പൊതുജനങ്ങൾ മടിക്കരുതെന്നും വിവരങ്ങൾ നൽകുന്നവരുടെ പേരുവിവരങ്ങൾ രഹസ്യമായി സൂക്ഷിക്കുമെന്നും അദ്ദേഹം ഉറപ്പുനൽകി.

നാക്കിൽ അണലിയെക്കൊണ്ട് കൊത്തിച്ചാൽ ലഹരിക്ക് പകരം ജീവൻ തന്നെ നഷ്ടപ്പെടുമെന്നായിരുന്നു ഡോ. ഷിംന അസീസ് ചൂണ്ടിക്കാണിച്ചിരുന്നത്. രക്തത്തെ ബാധിക്കുന്ന ഹീമോടോക്സിക് വിഷമുള്ള അണലി വെറുതെ കൊത്തിയാൽ പോലും വിഷം ഉള്ളിലെത്തിയാൽ മരണം സംഭവിക്കാൻ സാധ്യത വളരെ കൂടുതലാണെന്നും, അത്തരം സാഹചര്യങ്ങളിൽ ജീവൻ രക്ഷിച്ചെടുക്കുക എന്നത് അതീവ ശ്രമകരമാണെന്നുമുള്ള ശാസ്ത്രീയ വശം വ്യക്തമാക്കിയതിനാണ് മന്ത്രി ഇപ്പോൾ പരസ്യമായി നന്ദി അറിയിച്ചിരിക്കുന്നത്.