കുടുംബവഴക്ക്; കൊലപാതകങ്ങളിൽ ഞെട്ടിവിറച്ച് തലസ്ഥാന നഗരി; കഴക്കൂട്ടത്ത് മത്സ്യത്തൊഴിലാളി കുത്തേറ്റ് മരിച്ചു

തിരുവനന്തപുരം : കുടുംബവഴക്കിനെത്തുടർന്നുള്ള കൊലപാതകങ്ങളിൽ ഞെട്ടിവിറച്ച് തലസ്ഥാന നഗരം . കാഞ്ഞിരംകുളത്ത് കുടുംബ വഴക്കിനിടെ മർദനമേറ്റ പ്രാദേശിക കോൺഗ്രസ് നേതാവ് മരിച്ചതിന്റെ ഞെട്ടൽ മാറുന്നതിന് മുന്നേ കഴക്കൂട്ടത്ത് കുടുംബവഴക്കിനെത്തുടർന്നുള്ള സമാന സംഭവത്തിൽ മത്സ്യത്തൊഴിലാളി കുത്തേറ്റ് മരിച്ചു. കഠിനംകുളം ശാന്തിപുരം റിനു ഹൗസിൽ റിച്ചാർഡ് (53) ആണ് കൊല്ലപ്പെട്ടത്. ഇയാളുടെ ഭാര്യാസഹോദരിയുടെ മകനും ശാന്തിപുരം സ്വദേശിയുമായ സനൽ ലോറൻസ് (28) ആണു കുത്തിയത്. ഞായറാഴ്ച ഉച്ചയ്‌ക്ക് 2.30 ഓടെയായിരുന്നു സംഭവം.

ഇരുവരും അടുത്തടുത്താണ് താമസിക്കുന്നത്. കുടുംബതർക്കത്തെ തുടർന്ന് സനൽ കുത്തുകയായിരുന്നു എന്നു പൊലീസ് പറഞ്ഞു. ആക്രമണത്തിൽ ഇയാൾക്കും പരുക്കേറ്റിട്ടുണ്ട്. ഇയാളെ പൊലീസ് കസ്റ്റഡിയിലെടുത്തു.