കവാടത്തില്‍ ഫണമുയര്‍ത്തി നില്‍ക്കുന്ന സർപ്പങ്ങൾ; ശ്രീ മഹാമേരു ക്ഷേത്രം എന്ന അത്ഭുത ലോകം

കവാടത്തില്‍ ഫണമുയര്‍ത്തി നില്‍ക്കുന്ന സർപ്പങ്ങൾ; ശ്രീ മഹാമേരു ക്ഷേത്രം എന്ന അത്ഭുത ലോകം | SRI YANTRA MAHAMERU TEMPLE

മധ്യപ്രദേശിലെ പ്രസിദ്ധമായ നിര്‍മ്മാണരീതികളില്‍ ഒന്നാണ് മഹാമേരു ശ്രീ യന്ത്ര ക്ഷേത്രം. അതിമനോഹരമായ രൂപകല്പനയും, സങ്കീര്‍ണ്ണമായ നിര്‍മ്മാണ രീതികളും ചേര്‍ന്ന ഈ ക്ഷേത്രം കുറേയധികം കാലങ്ങളായി സഞ്ചാരികളുടെയും വിശ്വാസികളുടെയും ശ്രദ്ധ പിടിച്ചുപറ്റി നില്‍ക്കുകയാണ്. പ്രകൃതി ഒരുക്കിയ സ്വര്‍ഗ്ഗത്തിനു നടുവിലായാണ് ഈ ക്ഷേത്രം സ്ഥിതി ചെയ്യുന്നത്. ഈ ഭംഗി തന്നെയാണ് ശ്രീ യന്ത്ര ക്ഷേത്രത്തെ മധ്യ പ്രദേശിലെ മറ്റു ക്ഷേത്രങ്ങളില്‍ നിന്നും വ്യത്യസ്തമാക്കുന്നതും. ഇരുവശത്തുമായി തിങ്ങി നിറഞ്ഞു നില്‍ക്കുന്ന വനത്തിന്റെ പച്ചപ്പിനു നടുവിലെ ഒരു തവിട്ടു പൊട്ടായാണ് ക്ഷേത്രത്തിന്റെ സ്ഥാനം.

വ്യത്യസ്തവും മറ്റൊരിടത്തും അത്രയധികം കാണുവാന്‍ സാധിക്കാത്തതുമായ നിര്‍മ്മാണ രീതിയും, വാസ്തുവിദ്യയുമാണ് ഇവിടെയുള്ളത്. ക്ഷേത്രത്തിന്റെ കവാടം മുതല്‍ തന്നെ അത്ഭുതങ്ങളുടെ ലോകം ആരംഭിക്കുകയാണ്. നിറയെ കൊത്തുപണികളാണ് കവാടത്തില്‍ കാണുവാനുള്ളത്. ഇതിലും കൂടിയ കാഴ്ചകളാണ് മുന്നോട്ട് പ്രതീക്ഷിക്കേണ്ടത്. സരസ്വതി, കാളി, ഭുവനേശ്വരി, ലക്ഷ്മി ദേവതകളുടെ മുഖങ്ങളു‌‌ടെ കൊത്തുപണികളാണ് കവാടത്തിന്റെ നാലുമുഖങ്ങളിലും കാണുവാനുള്ളത്. താഴേക്ക് നോക്കുകയാണെങ്കില്‍ താന്ത്രിക ആരാധനയുമായി ബന്ധപ്പെട്ട 64 യോഗിനികളുടെ ശിൽപങ്ങളും കാണാം.

ഈ ക്ഷേത്രത്തിലെ നിര്‍മ്മാണത്തില്‍ കൂടുതലും കടന്നു വരുന്ന രൂപം സര്‍പ്പങ്ങളുടേതാണ്. ഇതിലെടുത്തു പറയേണ്ടത്, ക്ഷേത്രത്തിന്‍റെ പുറംഭിത്തിയെ ചുറ്റിനിന്ന് കവാടത്തില്‍ ഫണമുയര്‍ത്തി നില്‍ക്കുന്ന സര്‍പ്പ രൂപമാണ്, പരസ്പരം ബന്ധിപ്പിച്ചിരിക്കുന്ന വാലുകളുള്ള സർപ്പങ്ങളെയും ഇവിടെ കാണാം. ഇത്തരത്തില്‍ ഒരു അത്ഭുത ലോകം തന്നെയാണ് ഇവിടെ നമ്മെ കാത്തിരിക്കുന്നത്.

പ്രത്യേക അറിയിപ്പ്: കോവിഡ് മഹാമാരിയുടെ രണ്ടാം വരവിന്റെ കാലത്ത് എല്ലാവരും മാസ്ക് ധരിച്ചും സാനിറ്റൈസ് ചെയ്തും സാമൂഹിക അകലം പാലിച്ചും വാക്‌സിൻ എടുത്തും പ്രതിരോധത്തിന് തയ്യാറാവണമെന്ന് തത്വമയി ന്യൂസ് അഭ്യർത്ഥിക്കുന്നു. ഓർക്കുക ഒന്നിച്ചു നിന്നാൽ നമുക്കീ മഹാമാരിയെ തോൽപ്പിക്കാനാവും. “സർക്കാർ നിർദ്ദേശങ്ങൾ പാലിക്കാം, നമുക്ക് മഹാമാരിയെ ഒന്നിച്ചു നേരിടാം”. വാക്സിന് എടുത്തും, സാമൂഹിക അകലം പാലിച്ചും, മാസ്ക് ധരിച്ചും ഈ മഹാമാരിയെ നമുക്ക് എത്രയുംവേഗം വേരോടെ പിഴുതെറിയാം. #BreakTheChain #CovidBreak #IndiaFightsCorona