‘വെറുമൊരു ഇറച്ചിക്കഷണം പോലെ തോന്നി’: യുകെ കൗമാര സൈനിക കോളേജിൽ പെൺകുട്ടികൾക്കെതിരെ ക്രൂരമായ ലൈംഗിക അതിക്രമങ്ങൾ അരങ്ങേറുന്നുവെന്ന് വെളിപ്പെടുത്തൽ! വൻ വിവാദം

ലണ്ടൻ: ബ്രിട്ടനിലെ പ്രമുഖ കൗമാര സൈനിക പരിശീലന കേന്ദ്രമായ ആർമി ഫൗണ്ടേഷൻ കോളേജിൽ പെൺകുട്ടികളായ ട്രെയിനികൾക്കെതിരെ ക്രൂരമായ ലൈംഗിക അതിക്രമങ്ങളും മാനസിക പീഡനങ്ങളും നടക്കുന്നതായി ആരോപണം. നോർത്ത് യോർക്ക്‌ഷെയറിലെ ഹാരോഗേറ്റിലുള്ള പരിശീലന കേന്ദ്രത്തിൽ വെച്ച് സഹപ്രവർത്തകരായ ജൂനിയർ സൈനികരിൽ നിന്നും മുതിർന്ന സ്റ്റാഫ് അംഗങ്ങളിൽ നിന്നും വലിയ തോതിലുള്ള വിവേചനവും ലൈംഗികാക്രമണവുമാണ് നേരിടേണ്ടി വന്നതെന്ന് മുൻ ക്യാഡറ്റുകൾ അന്താരാഷ്ട്ര മാദ്ധ്യമത്തോട് വെളിപ്പെടുത്തി. 17 വയസ്സ് മാത്രം പ്രായമുള്ളപ്പോൾ കൂട്ടബലാത്സംഗം, ലൈംഗിക അതിക്രമങ്ങൾ, രഹസ്യ നിരീക്ഷണം തുടങ്ങിയ ക്രൂരതകൾക്ക് ഇരയായതായി നാല് മുൻ വനിതാ സൈനികർ സാക്ഷ്യപ്പെടുത്തി.

ബ്രിട്ടനിലെ 19 വയസ്സിന് താഴെയുള്ളവർക്കായുള്ള ഏറ്റവും വലിയ സൈനിക പരിശീലന കേന്ദ്രമായ എഎഫ്‌സിയിൽ നിലവിൽ 889 ട്രെയിനികളിൽ 70 ഓളം പെൺകുട്ടികളുണ്ട്. എന്നാൽ സ്ഥാപനത്തിലെ മുതിർന്ന ഇൻസ്ട്രക്ടർമാർ പോലും സ്ത്രീവിരുദ്ധതയും ലൈംഗിക അധിക്ഷേപങ്ങളും പ്രോത്സാഹിപ്പിക്കുന്ന അന്തരീക്ഷമാണ് അവിടെ സൃഷ്ടിച്ചിരിക്കുന്നതെന്ന് ഇരയായ പെൺകുട്ടികൾ ആരോപിക്കുന്നു. ആഴ്ചകളോളം കൂട്ടബലാത്സംഗത്തിന് ഇരയായ തനിക്ക് ഒരു ഇറച്ചിക്കഷണം എന്നതിനപ്പുറം പരിഗണന ലഭിച്ചില്ലെന്നും, സംഭവം ഇൻസ്ട്രക്ടർമാരെ അറിയിച്ചപ്പോൾ തന്നെ കൂടുതൽ അധിക്ഷേപിക്കുകയാണ് ഉണ്ടായതെന്നും ഒരു പെൺകുട്ടി വെളിപ്പെടുത്തി. റൂമുകളുടെ ലോക്കുകൾ പ്രവർത്തനരഹിതമാക്കി പെൺകുട്ടികളുടെ സുരക്ഷ ഉറപ്പാക്കാതിരിക്കുകയും, വസ്ത്രം മാറുന്ന സമയങ്ങളിൽ അനുവാദമില്ലാതെ മുറികളിലേക്ക് കടന്നുവന്ന് നോക്കുന്നതും പതിവായിരുന്നുവെന്ന് മറ്റു ഇരകളും സാക്ഷ്യപ്പെടുത്തുന്നു.

വിവരകാശ നിയമപ്രകാരമുള്ള കണക്കുകൾ പ്രകാരം 2018 ജനുവരി മുതൽ 2025 ജൂൺ വരെയുള്ള കാലയളവിൽ മാത്രം ഇതേ കോളേജിൽ നിന്ന് ലൈംഗിക അനാചാരങ്ങളുമായി ബന്ധപ്പെട്ട് 176 പരാതികൾ റിപ്പോർട്ട് ചെയ്യപ്പെട്ടിട്ടുണ്ട്. ഇതിൽ 32 എണ്ണം സ്ഥിരം ജീവനക്കാർക്കെതിരെയും 144 എണ്ണം ജൂനിയർ സൈനികർക്കെതിരെയുമാണ്. പെൺകുട്ടികളുടെ ഈ ഗുരുതര വെളിപ്പെടുത്തലുകൾ പുറത്തുവന്നതോടെ ബ്രിട്ടീഷ് സൈന്യത്തിന്റെ പ്രതിച്ഛായയ്ക്ക് വലിയ തിരിച്ചടിയാണ് ഉണ്ടായിരിക്കുന്നത്. സംഭവം അതീവ ഗൗരവത്തോടെ കാണുന്നുവെന്നും കുറ്റക്കാർക്കെതിരെ ശക്തമായ നടപടികൾ സ്വീകരിക്കുമെന്നും ബ്രിട്ടീഷ് സൈനിക വക്താവ് വ്യക്തമാക്കിയിട്ടുണ്ട്.