ഡ്യൂറന്റ് ലൈനിൽ കടുത്ത സൈനിക ഏറ്റുമുട്ടൽ! ആറ് പാകിസ്ഥാൻ സൈനികർ കൊല്ലപ്പെട്ടതായി താലിബാൻ; സംഘർഷം കനക്കുന്നു

കാബൂൾ :പാകിസ്ഥാൻ-അഫ്ഗാനിസ്ഥാൻ അതിർത്തിയായ ഡ്യൂറന്റ് ലൈനിൽ പാക് സൈന്യവും അഫ്ഗാൻ താലിബാനും തമ്മിൽ അതിശക്തമായ ഏറ്റുമുട്ടൽ. കിഴക്കൻ അഫ്ഗാനിസ്ഥാനിലെ ഖോസ്റ്റ് പ്രവിശ്യയിലുണ്ടായ പോരാട്ടത്തിൽ ആറ് പാകിസ്ഥാൻ സൈനികർ കൊല്ലപ്പെട്ടതായും നിരവധി പേർക്ക് പരിക്കേറ്റതായും താലിബാൻ വൃത്തങ്ങൾ അവകാശപ്പെട്ടു. ഞായറാഴ്ച രാത്രി വൈകി ആരംഭിച്ച സംഘർഷം മണിക്കൂറുകൾ പിന്നിട്ടിട്ടും അയവില്ലാതെ തുടരുകയാണ്. ഒരു പാകിസ്ഥാൻ സൈനിക പോസ്റ്റ് താലിബാൻ പിടിച്ചെടുത്തതായും കൊല്ലപ്പെട്ട സൈനികന്റെ മൃതദേഹം തങ്ങളുടെ കസ്റ്റഡിയിലാണെന്നും സ്ഥിരീകരിക്കാത്ത റിപ്പോർട്ടുകളുണ്ട്. ഇരുഭാഗത്തുനിന്നും കനത്ത രീതിയിലുള്ള വെടിവെപ്പും മോർട്ടാർ ഷെല്ലാക്രമണവുമാണ് നടക്കുന്നത്.

2021-ൽ താലിബാൻ അഫ്ഗാനിസ്ഥാനിൽ അധികാരം പിടിച്ചെടുത്തതിനുശേഷം ഇരുരാജ്യങ്ങളും തമ്മിലുള്ള ബന്ധം അതീവ വഷളായ നിലയിലാണ്. പാകിസ്ഥാനിൽ നിരന്തരം ആക്രമണങ്ങൾ നടത്തുന്ന തെഹ്‌രീകെ താലിബാൻ പാകിസ്ഥാൻ (ടിടിപി) എന്ന ഭീകരസംഘടനയ്ക്ക് അഫ്ഗാൻ താലിബാൻ സുരക്ഷിത താവളം ഒരുക്കുന്നു എന്നാണ് ഇസ്ലാമാബാദിന്റെ പ്രധാന ആരോപണം. എന്നാൽ ഈ ആരോപണങ്ങൾ നിഷേധിക്കുന്ന കാബൂൾ ഭരണകൂടം, അതിർത്തിയിലെ പാകിസ്ഥാന്റെ വേലിക്കെട്ടുകളെയും വ്യോമാക്രമണങ്ങളെയും ശക്തമായി എതിർക്കുന്നു. ചരിത്രപരമായിത്തന്നെ ഡ്യൂറന്റ് ലൈൻ അതിർത്തിയായി അംഗീകരിക്കാൻ അഫ്ഗാനിസ്ഥാൻ തയ്യാറായിട്ടില്ല എന്നതും തർക്കങ്ങൾ പരിഹരിക്കപ്പെടാത്തതിന് കാരണമാകുന്നു.

പാകിസ്ഥാൻ കാലങ്ങളായി പിന്തുടരുന്ന തീവ്രവാദ ഗ്രൂപ്പുകളെ സഹായിക്കുന്ന തന്ത്രം ഇപ്പോൾ അവർക്കുതന്നെ തിരിച്ചടിയായി മാറുന്ന കാഴ്ചയാണ് അതിർത്തിയിൽ ദൃശ്യമാകുന്നത്. ടിടിപിയുടെ ശക്തമായ തിരിച്ചുവരവ് പാകിസ്ഥാൻ സുരക്ഷാ സേനയ്ക്ക് വലിയ തലവേദനയാണ് സൃഷ്ടിക്കുന്നത്. ഖോസ്റ്റ് മേഖലയിൽ ഇപ്പോഴും ഇടവിട്ടുള്ള വെടിവെപ്പ് തുടരുന്നതായാണ് വിവരം. സംഘർഷം രൂക്ഷമായതോടെ അതിർത്തി ഗ്രാമങ്ങളിൽ വസിക്കുന്ന ജനങ്ങൾ സുരക്ഷിത സ്ഥാനങ്ങളിലേക്ക് മാറുകയാണ്. മേഖലയിലെ സമാധാന അന്തരീക്ഷം തകരുന്നതിനൊപ്പം ദക്ഷിണേഷ്യൻ സുരക്ഷാ ക്രമങ്ങളിലും ഈ ഏറ്റുമുട്ടൽ വലിയ പ്രത്യാഘാതങ്ങൾ ഉണ്ടാക്കിയേക്കും.