തിരുവല്ല: സിപിഎം ഓതറ ലോക്കൽ കമ്മിറ്റിയിൽ കൂട്ട രാജിക്ക് പിന്നാലെ തമ്മിലടി. ഡിവൈഎഫ്ഐ ബ്ലോക്ക് ട്രഷറർ ഒ.എസ്.സുധീഷിന്റെ കൈ ഡിവൈഎഫ്ഐ മേഖല സെക്രട്ടറി രാഹുൽ ഗോപി തല്ലിയൊടിച്ചു. സുധീഷ് സ്വകാര്യ ആശുപത്രിയിൽ ചികിത്സ തേടി. നാളെ പോലീസിൽ പരാതി നൽകുമെന്ന് സുധീഷ് പറഞ്ഞു. പൊട്ടൽ ഉണ്ടായതിനെ തുടർന്ന് സുധീഷിന്റെ കൈക്ക് പ്ലാസ്റ്റർ ഇട്ടിരിക്കുകയാണ്
ഇന്നലെ രാത്രി മാമ്മൂട് ജംഗ്ഷനിലായിരുന്നു സംഭവം. കഴിഞ്ഞ ദിവസമാണ് ഒ.എസ്.സുധീഷും രാഹുൽ ഗോപിയുമടക്കം 6 പേർ പാർട്ടിയിൽനിന്ന് രാജി വെക്കുന്നതായി സംസ്ഥാന സെക്രട്ടറിക്കു കത്തു നൽകിയത്. ഇതിലുള്ള രാഹുൽ ഗോപി, ബെന്നി മാത്യു എന്നിവർ രാജിക്കത്തിൽ ഒപ്പിട്ടിട്ടില്ലെന്നും തങ്ങളുടെ വ്യാജ ഒപ്പിട്ടാണ് കത്തയച്ചിരിക്കുന്നതെന്നും സംസ്ഥാന സെക്രട്ടറിയെയും ജില്ലാ സെക്രട്ടറിയെയും അറിയിച്ചിരുന്നു. പിന്നാലെയാണ് രാജിക്കത്തയച്ച ഒ.എസ്.സുധീഷും രാഹുൽ ഗോപിയുമായി വാക്കുതർക്കം ഉണ്ടാകുകയും കയ്യാങ്കളിയിലേക്ക് മാറുകയും ചെയ്തത്.
