ഒടുവിൽ ആ സഞ്ചാരിയുടെ പേര് പുറത്ത് !ബഹിരാകാശ നിലയത്തിൽ നിന്ന് സഞ്ചാരികളെ അടിയന്തരമായി ഭൂമിയിലേക്ക് മടക്കികൊണ്ടുവന്ന സംഭവത്തിൽ രോഗബാധിതന്റെ പേര് വെളിപ്പെടുത്തി നാസ

ആരോഗ്യപ്രശ്നങ്ങളെ തുടർന്ന് അന്താരാഷ്ട്ര ബഹിരാകാശ നിലയത്തിൽ നിന്ന് സഞ്ചാരികളെ അടിയന്തരമായി ഭൂമിയിലേക്ക് മടക്കികൊണ്ടുവന്ന സംഭവത്തിൽ രോഗബാധിതന്റെ പേര് പുറത്ത്. നാസയുടെ ബഹിരാകാശ സഞ്ചാരിയായിരുന്ന മൈക്ക് ഫിൻകെ ആയിരുന്നു അത്. അദ്ദേഹം തന്നെയാണ് ഔദ്യോഗിക പ്രസ്താവന പുറത്തിറക്കിയത്. സഹപ്രവർത്തകരായ സീന കാർഡ്മാൻ, കിമിയ യുയി, ഒലെഗ് പ്ലാറ്റോനോവ്, ക്രിസ് വില്യംസ്, സെർജി കുഡ്-സ്വെർച്ച്കോവ്, സെർജി മികയേവ് എന്നിവരോടും നാസയിലെയും സ്പേസ് എക്സിലെയും മുഴുവൻ ടീമുകളോടും അദ്ദേഹം നന്ദി രേഖപ്പെടുത്തി. സാൻഡിയഗോയിലെ സ്ക്രിപ്സ് മെമ്മോറിയൽ ആശുപത്രിയിലെ ഡോക്ടർമാർക്കും അദ്ദേഹം നന്ദി അറിയിച്ചു.

താൻ ഇപ്പോൾ സുഖമായിരിക്കുന്നുവെന്നും ഹൂസ്റ്റണിലെ നാസയുടെ ജോൺസൺ സ്പേസ് സെന്ററിൽ ബഹിരാകാശ ദൗത്യത്തിനുശേഷമുള്ള പതിവ് പുനരധിവാസ പ്രവർത്തനങ്ങൾ നടന്നുകൊണ്ടിരിക്കുകയാണെന്നും അദ്ദേഹം പറഞ്ഞു

ജനുവരി എട്ടിനാണ്ദൗത്യത്തിന്റെ കാലാവധി പൂർത്തിയാക്കുന്നതിന് മുന്നേ സഞ്ചാരികളെ മടക്കി കൊണ്ടുവരാനുള്ള തീരുമാനം നാസ ലോകത്തെ അറിയിച്ചത്. ജനുവരി 15-ന് നാല് സഞ്ചാരികൾ തിരികെയെത്തി. നാസയുടെ മൈക്ക് ഫിൻകെ, സീന കാർഡ്മാൻ, ജപ്പാനിൽനിന്ന് കിമിയ യുയി, റഷ്യയുടെ ഒലെഗ് പ്ലാറ്റോനോവ് എന്നിവരാണ് തിരികെയെത്തിയത്.
ഒരു ബഹിരാകാശ യാത്രികനുണ്ടായ ആരോഗ്യപരമായ പ്രശ്നത്തെത്തുടർന്നാണ് ക്രൂ-11-ന്റെ യാത്ര നേരത്തെ അവസാനിപ്പിച്ചതെന്ന് നാസ വ്യക്തമാക്കിയിരുന്നുവെങ്കിലും രോഗബാധിതൻ ആരായിരുന്നുവെന്നോ എന്താണ് ആരോഗ്യപ്രശ്നമെന്നോ നാസ വെളിപ്പെടുത്തിയിരുന്നില്ല.