സാമ്പത്തിക പ്രതിസന്ധി!കേരള കലാമണ്ഡലത്തിൽ കൂട്ടപ്പിരിച്ചുവിടൽ .69 അദ്ധ്യാപകരടക്കം 125 താത്കാലിക ജീവനക്കാരെ പിരിച്ചുവിട്ടു

തൃശ്ശൂർ. കേരള കലാമണ്ഡലത്തിൽ സാമ്പത്തിക പ്രതിസന്ധിയെ തുടർന്ന് കൂട്ടപ്പിരിച്ചുവിടൽ. 69 അദ്ധ്യാപകരടക്കം 125 താത്കാലിക ജീവനക്കാരുടെ സേവനം ഡിസംബര്‍ ഒന്നു മുതല്‍ അവസാനിപ്പിച്ചുകൊണ്ടാണ് വൈസ് ചാന്‍സലര്‍ ഉത്തരവിറക്കിയത്.കേരളത്തിൻറെ അഭിമാനമായ കേരള കലാമണ്ഡലത്തിന്റെ പ്രവർത്തനങ്ങൾ തന്നെ അട്ടിമറിക്കുന്നതാണ് പുതിയ ഉത്തരവ്. അദ്ധ്യാപകരുടെത് ഉൾപ്പെടെയുള്ള സ്ഥിരം തസ്തികകളിൽ നിയമനം ഇല്ലാതിരുന്നതോടെയാണ് താൽക്കാലിക ജീവനക്കാരെ നിയമിച്ച് പ്രവർത്തനം മുന്നോട്ടു കൊണ്ടുപോയിരുന്നത്. ഇവരുടെ ശമ്പളം ഉൾപ്പടെ മുടങ്ങുന്നത് പതിവായിരിക്കയാണ് സാമ്പത്തിക പ്രതിസന്ധി ചൂണ്ടിക്കാട്ടി താൽക്കാലിക ജീവനക്കാരെ പിരിച്ചുവിട്ടത്.

അതേസമയം ഇതോടെ കലാമണ്ഡലത്തിലെ അധ്യായനം മുടങ്ങും. ഹോസ്റ്റലില്‍ മുഴുവന്‍ ജീവനക്കാരും തിമില, കൂടിയാട്ടം സ്ത്രീവേഷം എന്നിവയിലെ എല്ലാവരും താത്കാലിക ജീവനക്കാരാണ്. സ്‌കൂള്‍ വിഷയങ്ങള്‍ പഠിപ്പിക്കുന്നതും ഇവരാണ്. പിരിച്ചുവിട്ടവരില്‍ പലരും പത്തുവര്‍ഷത്തിലധികമായി ജോലിചെയ്യുന്നവരാണ്. കലാമണ്ഡലത്തെ സമ്പൂര്‍ണ സാംസ്‌കാരിക സര്‍വകലാശാലയാക്കുമെന്ന പ്രഖ്യാപനത്തിനിടയിലാണ് കൂട്ടപ്പിരിച്ചുവിടല്‍. അതേസമയം നൃത്തേതര കലാരംഗത്ത് പ്രശസ്തരായവരുൾപ്പെടെ താൽക്കാലിക അദ്ധ്യാപകരായി കലാമണ്ഡലത്തിൽ പഠിപ്പിക്കുന്നുണ്ട്.എട്ടാം ക്ലാസ് മുതലാണ് കലാമണ്ഡലത്തിൽ വിദ്ധ്യാർത്ഥികൾക്ക് പ്രവേശനം. 2006 മുതലാണ് ഡീംഡ് സർവ്വകലാശാല പദവി ലഭിച്ചത്. ഗുരുകുല സമ്പ്രദായത്തിലാണ് ഇവിടെ വിദ്യാഭ്യാസം നടക്കുന്നത്. എന്നാൽ കൂട്ടപിരിച്ചുവിടലിന്റെ വാർത്ത പുറത്തുവന്നതോടെ വലിയ പ്രതിഷേധവും വിവിധ കോണുകളിൽ നിന്നുയരുന്നുണ്ട്.