ഉന്നതരുടെ സാമ്പത്തിക ക്രമക്കേട്;അവസാനം അനേകായിരങ്ങൾക്ക് സൗഖ്യമേകിയ ആതുരാലയം അടച്ചു പൂട്ടലിലേക്കോ ?ഇരിഞ്ഞാലക്കുട കോ – ഓപ്പറേറ്റിവ് ഹോസ്പിറ്റൽ ലേലത്തിന്

ഇരിഞ്ഞാലക്കുട : വർഷങ്ങളായി അനേകായിരം രോഗികൾക്ക് രോഗസൗഖ്യം നൽകിയ, ഇപ്പോഴും ദിനം പ്രതി ഒട്ടനവധി രോഗികൾ ആശ്രയിക്കുന്ന ഇരിഞ്ഞാലക്കുട സഹകരണ ആശുപത്രി ലേലവിൽപ്പന നടത്തുന്നു.ഹഡ്കോയുടെ വായ്പ കുടിശ്ശിക ഈടാക്കുന്നതിന്റെ ഭാഗമായാണ് ലേല വിൽപ്പന നടത്തുന്നത്.
1998 ൽ ആശുപത്രിയിലെ വികസനപ്രവർത്തനങ്ങൾക്കായി ഹഡ്കോയിൽ നിന്നും 4.66 കോടി രൂപ വായ്പ എടുത്തിരുന്നു. എന്നാൽ ഇത് തിരിച്ചടയ്ക്കുന്നതിൽ ഭരണസമിതി നിരന്തരമായി വീഴ്ച വരുത്തുകയായിരുന്നു. ഇതിനെ തുടർന്നാണ് മറ്റൊരു വഴിയുമില്ലാതെ ഹഡ്കോ, Debts Recovery Tribunal നെ സമീപിച്ചത് . തുടർന്നുണ്ടായ നടപടികളാണ് ആശുപത്രി വരുന്ന മാർച്ച് 2 നു ലേല വിൽപ്പന നടത്തി ഹഡ്കോവായ്പാ തിരികെ പിടിക്കുന്നതിൽ എത്തിയിരിക്കുന്നത്.

വർഷങ്ങളായി ആശുപത്രി നടത്തിപ്പ് കൈകാര്യം ചെയ്യുന്ന ഇരിഞ്ഞാലക്കുട കോ – ഓപ്പറേറ്റിവ് ഹോസ്പിറ്റൽ സൊസൈറ്റിയുടെ ഉന്നതരുടെ സാമ്പത്തിക ക്രമക്കേടുകളുടെയും കെടുകാര്യസ്ഥതയുടെയും ഫലമായാണ് ആശുപത്രി ഈ ദുരവസ്ഥ നേരിടുന്നത് എന്നാണ് പരക്കെയുള്ള ആക്ഷേപം. പ്രദേശത്തെ പ്രമുഖ കോൺഗ്രസ്സ് പ്രവർത്തകനായ എംപി ജാക്‌സനാണ് സൊസൈറ്റിയുടെ പ്രസിഡന്റ്.