അധികാരം നഷ്ടപ്പെട്ടതിന് ശേഷം ആദ്യം ! ഒരു പതിറ്റാണ്ടിന് ശേഷം സ്വാതന്ത്ര്യദിനാഘോഷത്തിൽ പങ്കെടുത്ത് പ്രതിപക്ഷ നേതാവ് !

ദില്ലി : ഒരു പതിറ്റാണ്ടിന് ശേഷം സ്വാതന്ത്ര്യദിനാഘോഷത്തിൽ പങ്കെടുത്ത് പ്രതിപക്ഷ നേതാവ്. ചെങ്കോട്ടയിൽ നടന്ന സ്വാതന്ത്ര്യദിനാഘോഷ പരിപാടിയിൽ പ്രതിപക്ഷ നേതാവ് രാഹുൽ ഗാന്ധി പങ്കെടുത്തു. അധികാരം നഷ്ടപ്പെട്ടതിന് ശേഷം ആദ്യമായിട്ടാണ് കോൺഗ്രസ് നേതാവ് ചെങ്കോട്ടയിൽ പങ്കെടുക്കുന്ന പരിപാടികളിൽ പങ്കെടുക്കുന്നത്.

കേന്ദ്രസർക്കാരിന്റെ ക്ഷണം സ്വീകരിച്ച് രാവിലെ ഏഴ് മണിയോടെ തന്നെ രാഹുൽ ഗാന്ധി ചെങ്കോട്ടയിൽ എത്തിയിരുന്നു. പാരിസ് ഒളിമ്പിക്‌സിൽ മെഡൽ നേടിയ താരങ്ങൾക്കൊപ്പമായിരുന്നു രാഹുൽ ഗാന്ധിക്കായി ഇരിപ്പിടം ഒരുക്കിയത്. ഹോക്കി ടീമിന്റെ ക്യാപ്റ്റനായ ഹർമൻപ്രീത് സിംഗിന് സമീപം ഇരുന്നുകൊണ്ടാണ് രാഹുൽ ഗാന്ധി സ്വാതന്ത്ര്യദിനാഘോഷ പരിപാടികൾ വീക്ഷിച്ചത്.

2014 ലെ ലോക്‌സഭാ തെരഞ്ഞെടുപ്പോടെയാണ് കോൺഗ്രസിന് അധികാരം നഷ്ടമായത്. അങ്ങനെ പ്രതിപക്ഷത്തായ കോൺഗ്രസ് ഔദ്യോഗികമായി പ്രതിപക്ഷ നേതാവിനെ തുടർന്ന് പ്രഖ്യാപിച്ചിരുന്നില്ല. പകരം കോൺഗ്രസ് ദേശീയ അദ്ധ്യക്ഷൻമാരെയാണ് തെരഞ്ഞെടുത്തത്. എന്നാൽ ഇത്തവണ രാഹുൽ ഗാന്ധിയെ പ്രതിപക്ഷ നേതാവായി പ്രഖ്യാപിക്കുകയായിരുന്നു.