അഞ്ച് പുതിയ ജില്ലകൾ!! ലഡാക്കിന്റെ വികസന ചരിത്രത്തിൽ പുതിയ അദ്ധ്യായം! കേന്ദ്ര വിജ്ഞാപനത്തിന് അംഗീകാരം നൽകി ഗവർണർ

ലഡാക്കിന്റെ ഭരണപരമായ ചരിത്രത്തിൽ നിർണ്ണായകമായ ഒരു ചുവടുവെപ്പ് നടന്നുകൊണ്ട്, ലഫ്റ്റനന്റ് ഗവർണർ വിനയ് കുമാർ സക്സേന ലഡാക്കിൽ അഞ്ച് പുതിയ ജില്ലകൾ രൂപീകരിച്ചതായി ഔദ്യോഗികമായി അറിയിച്ചു. നൂബ്ര, ഷാം, ചാങ്താങ്, സൻസ്കർ, ദ്രാസ് എന്നിങ്ങനെ അഞ്ച് പുതിയ ജില്ലകളാണ് ഇതോടെ നിലവിൽ വരുന്നത്. ഇതിനു മുൻപ് ലേ, കാർഗിൽ എന്നീ രണ്ട് ജില്ലകൾ മാത്രമായിരുന്നു കേന്ദ്രഭരണ പ്രദേശമായ ലഡാക്കിലുണ്ടായിരുന്നത്. പുതിയ പ്രഖ്യാപനത്തോടെ ലഡാക്കിലെ ആകെ ജില്ലകളുടെ എണ്ണം ഏഴായി ഉയർന്നു. ജനങ്ങളുടെ ദീർഘകാലമായുള്ള ആവശ്യവും ആഗ്രഹവുമാണ് ഈ തീരുമാനത്തിലൂടെ യാഥാർത്ഥ്യമായതെന്ന് ലഫ്റ്റനന്റ് ഗവർണർ സമൂഹമാധ്യമത്തിലൂടെ വ്യക്തമാക്കുകയും ഇത് ലഡാക്കിനെ സംബന്ധിച്ചിടത്തോളം ചരിത്രപരമായ നിമിഷമാണെന്ന് വിശേഷിപ്പിക്കുകയും ചെയ്തു.

2024 ഓഗസ്റ്റ് മാസത്തിൽ കേന്ദ്ര ആഭ്യന്തര മന്ത്രാലയം അംഗീകരിച്ച തീരുമാനമാണിത്. പ്രധാനമന്ത്രി നരേന്ദ്ര മോദിയുടെ വികസന സ്വപ്നങ്ങൾക്ക് അനുസൃതമായാണ് ഈ ഭരണപരമായ വികേന്ദ്രീകരണം നടപ്പിലാക്കുന്നത്. ഗ്രാമീണതലത്തിൽ മികച്ച ഭരണം ഉറപ്പാക്കാനും, തീർത്തും ഒറ്റപ്പെട്ട പ്രദേശങ്ങളിലേക്ക് സർക്കാർ സേവനങ്ങൾ കൂടുതൽ വേഗത്തിലും കാര്യക്ഷമമായും എത്തിക്കാനും പുതിയ ജില്ലകൾ സഹായിക്കും. ഇത് മേഖലയിൽ തൊഴിൽ അവസരങ്ങൾ വർദ്ധിപ്പിക്കുന്നതിനും സംരംഭകത്വത്തിന് പുതിയ വാതിലുകൾ തുറക്കുന്നതിനും കാരണമാകുമെന്നും സർക്കാർ കരുതുന്നു.

ഈ ഭരണപരമായ മാറ്റങ്ങൾ നടപ്പിലാക്കുന്നത് ലഡാക്കിലെ രാഷ്ട്രീയ സാഹചര്യങ്ങൾ സജീവമായിരിക്കുമ്പോഴാണ്. ലേ അപെക്സ് ബോഡി (LAB), കാർഗിൽ ഡെമോക്രാറ്റിക് അലയൻസ് (KDA) എന്നിവരുമായി കേന്ദ്ര സർക്കാർ മെയ് 22-ന് അടുത്തഘട്ട ചർച്ചകൾ നടത്താനിരിക്കുകയാണ്. ലഡാക്കിന് സംസ്ഥാന പദവിയും ആറാം ഷെഡ്യൂൾ പ്രകാരമുള്ള ഭരണഘടനാപരമായ സംരക്ഷണവും ആവശ്യപ്പെട്ട് ഇവർ ദീർഘകാലമായി പ്രക്ഷോഭത്തിലാണ്. ഇതിനിടയിലാണ് ഏപ്രിൽ 30-ന് കേന്ദ്ര ആഭ്യന്തര മന്ത്രി അമിത് ഷാ ലഡാക്ക് സന്ദർശിക്കുന്നത്. ലേയിൽ നടക്കുന്ന വിശുദ്ധ ബുദ്ധാവശിഷ്ടങ്ങളുടെ പ്രദർശന ചടങ്ങിൽ പങ്കെടുക്കാൻ എത്തുന്ന അദ്ദേഹം മേഖലയിലെ രാഷ്ട്രീയ സാഹചര്യങ്ങളും വിലയിരുത്തും.