മഴ… പെരുമഴ: രാജ്യ തലസ്ഥാനം വെള്ളത്തിൽ

ദില്ലി : കനത്ത മഴയിൽ മുങ്ങി രാജ്യതലസ്ഥാനം. ശക്തമായ ഇടി മിന്നിലോടുകൂടി ശനിയാഴ്ച്ച മുതൽ ആരംഭിച്ച മഴയിൽ നഗരനിരത്തുകൾ തടാകങ്ങളായി. ദില്ലി വിമാനത്താവളത്തിന്റെ ടെര്‍മിനല്‍ – 3ലേക്കു വെള്ളം ഇരച്ചുകയറിയതോടെ വിമാന സർവീസുകൾ റദ്ദാക്കി. ഇതോടെ ദില്ലിയിലേക്കുള്ള 5 വിമാനങ്ങൾ വഴി തിരിച്ചുവിട്ടു. വിമാനങ്ങള്‍ പാര്‍ക്ക് ചെയ്യുന്ന സ്ഥലത്തായിരുന്നു വെള്ളക്കെട്ട്. ടെർമിനലിനു മുന്നിൽ ജലനിരപ്പ് വലിയതോതിൽ ഉയർന്നെങ്കിലും അരമണിക്കൂറിനുള്ളിൽ വെള്ളം ഒഴുക്കിക്കളഞ്ഞതായി അധികൃതർ പറഞ്ഞു.

ശനിയാഴ്ച്ച പുലർച്ചെ തുടങ്ങിയ തോരാമഴയില്‍ റോഡുകളില്‍ വെള്ളം നിറഞ്ഞ് ഒട്ടേറെ വാഹനങ്ങള്‍ വഴിയില്‍ കുടുങ്ങി. മിന്നല്‍ പ്രളയത്തില്‍ അടിപ്പാതയില്‍ കുടുങ്ങിയ സ്വകാര്യ ബസിലെ 40 യാത്രക്കാരെയും വെള്ളക്കെട്ടില്‍ പെട്ട വാനില്‍ നിന്നു 18 പേരെയും അഗ്‌നിശമനസേന രക്ഷിച്ചു.

കാലവര്‍ഷം ആരംഭിച്ചതിനു ശേഷം ദില്ലിയില്‍ ഇക്കുറി ലഭിച്ചത് 1,136.6 മില്ലീ മീറ്റർ മഴയാണെന്നും കഴിഞ്ഞ 46 വര്‍ഷത്തിനിടെ ലഭിച്ച റെക്കോര്‍ഡ് മഴയാണിതെന്നും കാലാവസ്ഥ കേന്ദ്രം അറിയിച്ചു. മഴ തുടരുമെന്ന മുന്നറിയിപ്പിനെ തുടർന്ന് ഓറഞ്ച് അലർട്ട് പ്രഖ്യാപിച്ചു.