ലോകത്താദ്യമായി ​ഗർഭസ്ഥ ശിശുവിന് മസ്തിഷ്കത്തിൽ ശസ്ത്രക്രിയ;അപൂർവ ശസ്ത്രക്രിയ നടത്തി അമേരിക്കയിലെ ഡോക്ടർമാർ

ലോകത്താദ്യമായി ​ഗർഭസ്ഥ ശിശുവിന് മസ്തിഷ്കത്തിൽ ശസ്ത്രക്രിയ നടത്തി ഡോക്ടർമാർ. അമേരിക്കയിലെ ഡോക്ടർമാർ ഗർഭസ്ഥ ശിശുവിന്റെ തലച്ചോറിനുള്ളിലുണ്ടായ രക്തക്കുഴലിലെ തകരാർ പരിഹരിക്കുന്നതിനാണ് ശസ്ത്രക്രിയ നടത്തിയത്. ബോസ്റ്റൺ‌ ചിൽഡ്രൻസ് ആശുപത്രിയിലാണ് അപൂർവമായ ഈ ശസ്ത്രക്രിയ നടന്നത്.

ഗർഭസ്ഥ ശിശുവിന് വീനസ് ഓഫ് ഗ്ളെൻ മാൽ ഇൻഫർമേഷൻ എന്ന അപൂർവമായ തകരാറുണ്ടായിരുന്നു. ഇത് പരിഹരിക്കുന്നതിനാണ് ഡോക്ടർമാർ ശസ്ത്രക്രിയ നടത്തിയത്. മസ്തിഷ്കത്തിൽ നിന്നും ഹൃദയത്തിലേക്ക് രക്തം വഹിക്കുന്ന രക്തക്കുഴലുകൾ ശരിയായ രീതിയിൽ വികസിക്കാതെ വരുമ്പോഴാണ് ഈ അവസ്ഥ ഉണ്ടാകുന്നത്. തൽഫലമായി അമിതമായുള്ള രക്തപ്രവാഹം ധമനികളിൽ സമ്മർദം ഏൽപ്പിക്കുകയും നിരവധി ആരോ​ഗ്യപ്രശ്നങ്ങൾക്ക് കാരണമാവുകയും ചെയ്യും.

ജനിച്ചയുടൻ കുഞ്ഞിന് മസ്തിഷ്കത്തിന് കാര്യമായ പരിക്കുകൾ ഉണ്ടാവുകയോ തൽ‌ക്ഷണം ഹൃദയാഘാതം ഉണ്ടാവുകയോ ചെയ്യാമെന്നതാണ് ഈ അവസ്ഥയുടെ ഏറ്റവും വലിയ വെല്ലുവിളി. കുഞ്ഞുങ്ങൾ ജനിച്ചതിനുശേഷം രക്തപ്രവാഹം കുറയ്ക്കാൻ കതീറ്റർ ഉപയോ​ഗിച്ചുള്ള ചികിത്സയാണ് ചെയ്യാറുള്ളത്. പലപ്പോഴും അവ വൈകാറുമുണ്ട്. ഈ സാഹചര്യത്തിലാണ് ​ഗർഭസ്ഥ ശിശുവിന് ശസ്ത്രക്രിയ നടത്താൻ തീരുമാനിച്ചതെന്ന് ബോസ്റ്റൺ ചിൽഡ്രൻസ് ആശുപത്രിയിലെ റേഡിയോളജിസ്റ്റും ശസ്ത്രക്രിയയിൽ പങ്കാളിയുമായ ഡോ. ‍ഡാറെൻ ഒർബാച്ച് പറഞ്ഞു.