മുന്‍ ധനകാര്യമന്ത്രി വി വിശ്വനാഥ മേനോന്‍ അന്തരിച്ചു

കൊച്ചി: മുന്‍ മന്ത്രി വി വിശ്വനാഥ മേനോന്‍ അന്തരിച്ചു. 92 വയസ്സായിരുന്നു. കൊച്ചിയിലെ സ്വകാര്യ ആശുപത്രിയില്‍ ചികിത്സയിലായിരുന്നു. രാവിലെ എട്ടരയോടെയാണ് അന്ത്യം. രണ്ട് തവണ പാര്‍ലമെന്റ് അംഗമായ വിശ്വനാഥ മേനോന്‍ 1987ല്‍ ഇ കെ നായനാരുടെ മന്ത്രിസഭയില്‍ ധനകാര്യമന്ത്രിയായിരുന്നു. 12 വര്‍ഷം എഫ്‌എസിടി യൂണിയന്‍ പ്രസിഡന്റായിരുന്ന ഇദ്ദേഹം 14 വര്‍ഷം ഇന്‍ഡല്‍ യൂണിയന്റെയും പ്രസിഡന്റായിരുന്നിട്ടുണ്ട്. കൊച്ചി പോര്‍ട്ട് യൂണിയന്റെയും പ്രസിഡന്റായി വിശ്വനാഥ മേനോന്‍ സേവനമനുഷ്ഠിച്ചിട്ടുണ്ട്.

പഠനകാലത്തുതന്നെ സ്വാതന്ത്ര്യ സമരത്തിലും സംഘടനാപ്രവര്‍ത്തനത്തിലും സജീവമായിരുന്ന അദ്ദേഹം 1945ലാണ് ഇന്ത്യന്‍ കമ്മ്യൂണിസ‌്റ്റ‌് പാര്‍ട്ടിയില്‍ അംഗമായത്. 1960ലെ നിയമസഭാ തിരഞ്ഞെടുപ്പില്‍ കമ്യൂണിസ‌്റ്റ‌് പാര്‍ട്ടി സ്ഥാനാര്‍ഥിയായി എറണാകുളത്തു നിന്ന‌് മല്‍സരിച്ചെങ്കിലും പരാജയപ്പെട്ടു. 1967 ലെ തിരഞ്ഞെടുപ്പില്‍ സിപിഐ എം സ്ഥാനാര്‍ഥിയായി മല്‍സരിച്ച‌് വിജയിച്ചു. മുന്‍ കേന്ദ്രമന്ത്രി എ എം തോമസിനെതിരെ പതിനാറായിരത്തില്‍പരം വോട്ടിനായിരുന്നു ജയം.

പിന്നീട് 1971ല്‍ നടന്ന പാര്‍ലമെന്റ‌് തെരഞ്ഞെടുപ്പില്‍ മല്‍സരിച്ചെങ്കിലും പരാജയപ്പെട്ടു. 1974ല്‍ അദ്ദേഹം വീണ്ടും രാജ്യസഭയിലേക്ക‌് തിരഞ്ഞെടുക്കപ്പെട്ടു. 1987ലെ നിയമസഭാ തിരഞ്ഞെടുപ്പില്‍ വിജയിച്ചാണ് ഇ കെ നായനാര്‍ മന്ത്രിസഭയില്‍ അം​ഗമായത്. 1999 എറണാകുളത്ത് എൻഡിഎ സ്ഥാനാർഥിയായും അദ്ദേഹം മത്സരിച്ചിട്ടുണ്ട്. എന്നാൽ പിന്നീട് വീണ്ടും ഇടതുപക്ഷ അനുഭാവിയായി മാറുകയായിരുന്നു.

നിയമപഠനം പൂര്‍ത്തിയാക്കിയ അദ്ദേഹം അഭിഭാഷകനായും പ്രവര്‍ത്തിച്ചിട്ടുണ്ട്. ‘കാലത്തിനൊപ്പം മായാത്ത ഓര്‍മകള്‍’ എന്ന ആത്മകഥയും ഗാന്ധിയുടെ പീഡാനുഭവങ്ങള്‍ (നാടക വിവര്‍ത്തനം), മറുവാക്ക‌് (ലേഖന സമാഹാരം) എന്നീ ഗ്രന്ഥങ്ങളും വിശ്വനാഥ മേനോന്‍ രചിച്ചു. ഭാര്യ: കെ പ്രഭാവതി മേനോന്‍ (റിട്ട. അദ്ധ്യാപിക) മക്കള്‍: അഡ്വ. വി അജിത‌് നാരായണന്‍, ഡോ. വി മാധവചന്ദ്രന്‍