പിറന്നാള്‍ ദിനത്തില്‍ 14കാരി നേരിട്ടത് ക്രൂരമായ കൂട്ട ബലാത്സംഗം; 4 പേർ അറസ്റ്റിൽ

ബംഗളൂരു: പിറന്നാള്‍ ദിനത്തില്‍ പരിഭവപ്പെട്ട് വീടുവിട്ടിറങ്ങിയ 14കാരി ക്രൂരമായ കൂട്ട ബലാത്സംഗത്തിനിരയായി. കര്‍ണാടകയിലെ കൊലാര്‍ ജില്ലയില്‍ കാമസമുദ്ര പോലീസ് സ്റ്റേഷന്‍ പരിധിയിലാണ് സംഭവം. കേസില്‍ നാലുപേരെ പോലീസ് അറസ്റ്റ് ചെയ്തു.
ആനന്ദ് കുമാര്‍, കാന്തര രാജു, പ്രവീണ്‍, വേണു എന്നിവരാണ് അറസ്റ്റിലായത്.

പിറന്നാള്‍ ദിനത്തില്‍ പുതു വസ്ത്രങ്ങളും മിഠായിയും വാങ്ങി നല്‍കാത്തതില്‍ വീട്ടുകാരുമായി വഴക്കിട്ട പെണ്‍കുട്ടി സ്കൂളിലേക്ക് പോകുന്നതിന് പകരം ഭംഗാരപ്പേട്ടിലേക്ക് ബസ് കയറുകയായിരുന്നു. പെണ്‍കുട്ടി തനിച്ച്‌ യാത്ര ചെയ്യുന്നത് ശ്രദ്ധയില്‍പെട്ട പ്രതികള്‍ കുട്ടിയെ പാര്‍ക്കിലേക്ക് കൊണ്ട് പോകുകയും വൈകുന്നേരം വരെ പാര്‍ക്കില്‍ ചിലവഴിച്ച ശേഷം തനിമഗഡു ഗ്രാമത്തിലെത്തിച്ച്‌ ആളൊഴിഞ്ഞ സ്ഥലത്തുവെച്ച്‌ ബലാത്സംഗം ചെയ്യുകയുമായിരുന്നു.

പെണ്‍കുട്ടിയുടെ നിലവിളി കേട്ട് നാട്ടുകാര്‍ ഓടിയെത്തുകയായിരുന്നു. തുടർന്ന് നാട്ടുകാർ വിവരമറിയിച്ചതോടെ പോലീസ് സംഭവ സ്ഥലത്തെത്തി പ്രതികളെ പിടികൂടി. പെണ്‍കുട്ടി സര്‍ക്കാര്‍ ആശുപത്രിയില്‍ ചികിത്സയിലാണ്. പ്രതികള്‍ക്കെതിരെ പോക്സോ വകുപ്പുകള്‍ പ്രകാരം കേസെടുത്തതായി പോലീസ് അറിയിച്ചു.