തലസ്ഥാനത്ത് കഞ്ചാവ് മാഫിയയുടെ അഴിഞ്ഞാട്ടം !!പാറശാലയിൽ വീടിനടുത്തിരുന്ന് കഞ്ചാവുപയോഗിക്കുന്നത് ചോദ്യം ചെയ്തഗൃഹനാഥന്റെ ചെവി കഞ്ചാവ് മാഫിയ വെട്ടിയെറിഞ്ഞു

പാറശാല: പാറശാലയിൽ കഞ്ചാവ് മാഫിയ സംഘം ഗൃഹനാഥന്റെ ചെവി വെട്ടിയെറിഞ്ഞു. പരശുവയ്‌ക്കൽ സ്വദേശി അജിക്കാണ് വെട്ടേറ്റത്. അജിയെ തിരുവനന്തപുരം മെഡിക്കൽ കോളേജ് ആശുപത്രിയിൽ പ്രവേശിപ്പിച്ചു. അജിയുടെ ഭാര്യ വിജിയെയും ഒൻപത് വയസ്സുള്ള മകളെയും അക്രമി സംഘം മർദിച്ചു. ഇന്നലെ രാത്രി 10 മണിയോട് കൂടിയായിരുന്നു സംഭവം. ഒരു ചെവി പൂർണമായും വെട്ടി മാറ്റുകയായിരുന്നു. മൂന്ന് പേരും തിരുവനന്തപുരം മെഡിക്കൽ കോളേജ് ആശുപത്രിയിൽ ചികിത്സയിലാണ്.

അക്രമിസംഘത്തിലുണ്ടായിരുന്ന നാല് യുവാക്കളും മറ്റ് ചില സംഘങ്ങളും കഞ്ചാവ് വിൽക്കുകയും ഉപയോഗിക്കുകയും ചെയ്യുന്നുണ്ട്. അജിയുടെ പറമ്പിലിരുന്നും ഇവർ ലഹരി ഉപയോഗിക്കാറുണ്ട്. ഇത് അജി ചോദ്യം ചെയ്തിരുന്നു. ഇതിലുള്ള വിരോധം കൊണ്ടാണ് വീട്ടിൽ അതിക്രമിച്ച് കയറി മർദ്ദനം നടത്തിയതെന്നാണ് പോലീസ് പറയുന്നത്. കഴിഞ്ഞ മാസവും ഇതേ സംഘം മറ്റൊരു ഗൃഹനാഥന് നേരെ അക്രമം നടത്തിയിരുന്നു. ഇദ്ദേഹത്തിന്റെ തല അക്രമിസംഘം അടിച്ചു പൊളിക്കുകയായിരുന്നു

മകളുടെ കഴുത്തിൽ കിടന്ന ചെയിനും വീട്ടിലിരുന്ന പൈസയും അക്രമിസംഘം മോഷ്ടിച്ചതായും അജി പറയുന്നു. നാല് പേരാണ് അക്രമിസംഘത്തിൽ ഉണ്ടായിരുന്നത്. ഇതിൽ രണ്ട് പേർ അയൽവാസികളാണ്. മറ്റ് രണ്ട് പേരെ കണ്ട് പരിചയമില്ലെന്നും അജി പറയുന്നു