ഹമാസിന് നൽകേണ്ടി വരുന്നത് വലിയ വില ! ഗാസ ധനമന്ത്രി അടക്കം കൊല്ലപ്പെട്ടു ; ഗാസയിലെ പ്രധാനമേഖലകളെല്ലാം ഇസ്രയേല്‍ സേന പിടിച്ചെടുത്തു

ടെല്‍ അവീവ്: ഇസ്രയേല്‍- ഹമാസ് യുദ്ധം നാലാം ദിനത്തിലേക്ക് കടക്കുന്നതിനിടെ കടക്കുമ്പോള്‍ ഗാസയുടെ ധനകാര്യമന്ത്രി ജാവേദ് അബു ഷമാലയെയും മറ്റൊരു സുപ്രധാന ഹമാസ് നേതാവ് സക്കറിയ അബു മാമറിനെയും വ്യോമാക്രമണത്തില്‍ കൊലപ്പെടുത്തിയതായി ഇസ്രയേൽ അറിയിച്ചു. അതെ സമയം യുദ്ധത്തിൽ കൊല്ലപ്പെട്ടവരുടെ മരണം 1,700 കടന്നു. ഹമാസ് തീവ്രവാദികളുടെ റോക്കറ്റാക്രമണത്തിലും കരമാർഗമുള്ള ആക്രമണത്തിലും ഇസ്രയേലില്‍ മാത്രം ആയിരത്തിലധികം പേരാണ് കൊല്ലപ്പെട്ടതെന്നാണ് അന്താരാഷ്ട്ര മാദ്ധ്യമങ്ങൾ റിപ്പോർട്ട് ചെയ്യുന്നത്.

ഇതിനിടെ ഇസ്രയേലുമായി സന്ധിസംഭാഷണത്തിന് ഹമാസ് ഒരുക്കമാണെന്ന് അറിയിച്ചതായും റിപ്പോര്‍ട്ടുണ്ട്. ഗാസയിൽ ഉപരോധം ഏർപ്പെടുത്തുമെന്ന് ഇന്നലെ തന്നെ ഇസ്രയേൽ പ്രധാനമന്ത്രി അറിയിച്ചിരുന്നു.ഗാസയില്‍ നിന്ന് ഈജിപ്തിലേക്ക് കടക്കാനുള്ള ഏക വഴിയും ഇസ്രയേല്‍ സേനയുടെ അധീനതയിലാണ്. ഗാസയിലെ പ്രധാനമേഖലകളെല്ലാം ഇസ്രയേല്‍ സേന പിടിച്ചെടുത്തു.

ഗാസ മുനമ്പില്‍ 1,500 ഹമാസ് അംഗങ്ങളുടെ മൃതദേഹങ്ങള്‍ കണ്ടെടുത്തയായി ഇസ്രയേല്‍ അവകാശപ്പെട്ടു. ഗാസ അതിര്‍ത്തിയ്ക്ക് സമീപമുള്ള പൗരന്മാരെ ഇസ്രയേല്‍ ഒഴിപ്പിച്ചിട്ടുണ്ട്. ഇസ്രയേലിന്റെ പ്രത്യാക്രമണ ചൂടറിഞ്ഞതോടെ ഇസ്രയേല്‍ നടത്തുന്ന ഓരോ ആക്രമണത്തിനും പകരമായി, തട്ടിക്കൊണ്ടുവന്ന ഇസ്രയേലികളെ വധിക്കുമെന്ന് ഹമാസ് ഭീഷണി ഉയർത്തിയിട്ടുണ്ട്.