പട്നയിൽ ട്യൂഷൻ കഴിഞ്ഞ് വീട്ടിലേക്ക് മടങ്ങിയ പതിനാറുകാരിക്ക് നേരെ വെടിവയ്പ്പ്; പെൺകുട്ടിയെ പിന്നിൽ നിന്നും വെടിയവയ്ച്ച് വീഴ്ത്തുന്ന സിസിടിവി ദൃശ്യം പുറത്ത്; പ്രതിയെ കണ്ടെത്താനാവതെ പോലീസ്; അന്വേഷണം ഊർജിതം

പട്ന: ബിഹാറിലെ പട്നയിൽ ട്യൂഷൻ കഴിഞ്ഞ് വീട്ടിലേക്കു മടങ്ങുകയായിരുന്ന പതിനാറുകാരിയെ അജ്ഞാതൻ പിന്നിൽ നിന്നും വെടിവച്ചു വീഴ്ത്തുന്ന സിസിടിവി ദൃശ്യം പുറത്ത്. ബുധനാഴ്ച രാവിലെയാണ് സംഭവം. പിൻകഴുത്തിനു വെടിയേറ്റ പെൺകുട്ടിയെ ഗുരുതരാവസ്ഥയിൽ ആശുപത്രിയിൽ പ്രവേശിപ്പിച്ചു. വെടിയുതിർത്ത ശേഷം ഓടി രക്ഷപ്പെട്ട അക്രമിയെ ഇതുവരെ കണ്ടെത്താനായിട്ടില്ല.

പട്‍നയിലെ സിപാറ പ്രദേശത്താണ് ജനങ്ങളെ നടുക്കിയ അക്രമം ഉണ്ടായത്. ഒൻപതാം ക്ലാസിൽ പഠിക്കുന്ന പെൺകുട്ടിക്കാണ് വെടിയേറ്റത്. പ്രധാന റോഡിൽനിന്നും ഇടറോഡിലേക്കു തിരിയുന്ന പെൺകുട്ടി അക്രമിയെ മറികടന്ന് മുന്നോട്ടു പോകുന്നത് വിഡിയോയിൽ വ്യക്തമാണ്. ഇതിനു തൊട്ടുപിന്നാലെ കയ്യിലുള്ള സഞ്ചിയിൽനിന്ന് തോക്കെടുത്ത് ഇയാൾ പെൺകുട്ടിയെ പിന്നിലെത്തി വെടിയുതിർക്കുന്നതാണ് വിഡിയോയിലുള്ളത്. പെൺകുട്ടി മുന്നിലേക്കു വീഴുന്നതും അക്രമി ഓടി രക്ഷപ്പെടുന്നതും വിഡിയോയിൽ കാണാം.

വെടിവയ്പ്പിന് കാരണമെന്താണെന്ന് ഇതുവരെ കണ്ടെത്താനായില്ലെന്നാണ് പൊലീസ് പറയുന്നത്. സംഭവത്തിൽ അന്വേഷണം പുരോഗമിക്കുകയാണെന്നും പൊലീസ് അറിയിച്ചു.