ചൈനയ്‌ക്കെതിരെ ആഗോള പ്രതിഷേധം ശക്തമാക്കണം; ലോകരാഷ്‌ട്രങ്ങളുടെ പിന്തുണ ആവശ്യപ്പെട്ട് ടിബറ്റൻ പ്രവാസി ഭരണകൂടം ജപ്പാൻ സന്ദർശിക്കുന്നു

ടോക്കിയോ: ലോകരാഷ്‌ട്രങ്ങളുടെ പിന്തുണ ആവശ്യപ്പെട്ട് ടിബറ്റൻ പ്രവാസി ഭരണകൂടം ജപ്പാനിലെത്തി. ചൈന തങ്ങളുടെ ഭൂവിഭാഗത്തെ കീഴിലാക്കി നടത്തുന്ന മനുഷ്യാവകാശ ധ്വംസനങ്ങൾക്കെതിരെ ആഗോള പിന്തുണ നേടിയെടുക്കുന്നതിന്റെ ഭാഗമായിട്ടാണ് ടിബറ്റൻ സംഘം ജപ്പാനിലെത്തിയത്. മുൻ ടിബറ്റൻ ഭരണകൂട മേധാവി ലോബ്‌സാംഗ് സാംഗേയുടെ നേതൃത്വത്തിലുള്ളവരാണ് സംഘത്തിലുള്ളത്.

ജപ്പാനിലെ മനുഷ്യാവകാശ സംഘടന പ്രതിനിധികളേയും ആഗോളതലത്തിൽ വിഷയങ്ങൾ കൈകാര്യം ചെയ്യുന്ന അഭിഭാഷകരേയും നിയമവിദഗ്ധരേയും സാംഗേയും സംഘവും സന്ദർശിച്ചു. വിശദമായ പത്രസമ്മേളനം നടത്തിയ സാംഗേ കാലങ്ങളായി ചൈന ടിബറ്റിൽ നടത്തിക്കൊണ്ടിരിക്കുന്ന അതിക്രൂരമായ ആക്രമങ്ങൾ അക്കമിട്ടു നിരത്തി.

‘തങ്ങളുടെ ജപ്പാനിലേയ്‌ക്കുള്ള സന്ദർശനം എക്കാലത്തേക്കാളും ഗുണകരമാകുമെന്നാണ് പ്രതീക്ഷ. ടിബറ്റൻ ജനതയ്‌ക്ക് തങ്ങളുടെ ജന്മഭൂമി തിരികെ ലഭിക്കാൻ ലോകരാഷ്‌ട്രങ്ങളുടെ അടിയന്തിര ഇടപെടൽ അനിവാര്യമാണ്’സാംഗ പറഞ്ഞു.

ജപ്പാനിലെ പാർലമെന്റ് മനുഷ്യാവകാശത്തിനായി രൂപീകരിച്ച സംയുക്ത പാർലമെന്ററി കമ്മറ്റി അദ്ധ്യക്ഷൻ ഫുറൂയ കേയ്ജിയും ടിബറ്റൻ പ്രവാസി ഭരണകൂടത്തിന്റെ സമിതി മേധാവി ഷിമൂമോറ ഹാക്കൂബൂൻ എന്നിവരാണ് ടിബറ്റ് വിഷയം ഗൗരവമായി ചർച്ച ചെയ്തത്.