മൂല്യാധിഷ്ഠിത രാഷ്ട്രീയത്തിൻ്റെ അധ്യായങ്ങളിലൊന്ന് അവസാനിക്കുകയാണെന്ന് പി എസ് ശ്രീധരൻ പിള്ള ! സാധാരണ മനുഷ്യർക്കും മണ്ണിനും വേണ്ടിയുള്ള അതിജീവനപോരാട്ടങ്ങളിൽ ജനപക്ഷത്ത് ഉറച്ചുനിന്ന നേതാവിനെ നഷ്ടമായെന്ന് ഡോ. സി വി ആനന്ദബോസ്; വി.എസ്. അച്യുതാനന്ദൻ്റെ വിയോഗത്തിൽ അനുശോചനമറിയിച്ച് ഗോവ , പശ്ചിമബംഗാൾ ഗവർണർമാർ

ഗോവ, കൊൽക്കത്ത : മുൻ മുഖ്യമന്ത്രി വി.എസ്. അച്യുതാനന്ദൻ്റെ വിയോഗത്തിൽ അനുശോചനമറിയിച്ച് ഗോവ , പശ്ചിമബംഗാൾ ഗവർണർമാർ . വി എസിന്റെ നിര്യാണത്തോടെ മൂല്യാധിഷ്ഠിത രാഷ്ട്രീയത്തിൻ്റെ അധ്യായങ്ങളിലൊന്ന് അവസാനിക്കുകയാണെന്ന് ഗോവ ഗവർണർ പി എസ് ശ്രീധരൻ പിള്ളയും സാധാരണ മനുഷ്യർക്കും മണ്ണിനും വേണ്ടിയുള്ള അതിജീവനപോരാട്ടങ്ങളിൽ എന്നും ജനപക്ഷത്തു ഉറച്ചുനിന്നുപ്രവർത്തിച്ച നേതാവായിരുന്നു വി എസെന്ന് പശ്ചിമബംഗാൾ ഗവർണർ ഡോ. സി വി ആനന്ദബോസും അനുസ്മരിച്ചു.

“താൻ വിശ്വസിക്കുന്ന തത്വശാസ്ത്രത്തിൽ അത് നടപ്പിൽ വരുത്താനുള്ള ദുഷ്കരമായ ശ്രമത്തിനിടയിൽ ത്യാഗത്തിൻ്റെയും സമർപ്പണത്തിൻ്റെയും ഏടുകൾ നിഷ്കാമ കർമ്മയോഗിയെ പോലെ നെഞ്ചിലേറ്റി നടന്ന ചരിത്രമാണ് അച്യുതാനന്ദനുള്ളത് . അദ്ദേഹത്തിൻ്റെ പ്രസ്ഥാനത്തെ നിരോധിക്കുകയും കരിനിയമങ്ങൾ ഉപയോഗപ്പെടുത്തി കൽതുറങ്കിലടക്കുകയും ഒക്കെ ചെയ്ത കാലഘട്ടത്തിൽ നിർഭയയമായി വെല്ലുവിളികൾ നേരിട്ട ചരിത്രമാണ് അദ്ദേഹത്തിനുള്ളത്. അങ്ങോട്ടു കൊടുക്കുന്നവരുടെ രാഷ്ട്രീയവും ഇങ്ങോട്ടു കണക്ക് പറഞ്ഞ് എടുക്കുന്നവരുടെ രാഷ്ട്രീയവും തമ്മിലുള്ള ശീത സമരത്തിൽ അച്യുതാനന്ദൻ ആദ്യം പറഞ്ഞവരുടെ പക്ഷത്തായിരുന്നു. എപ്പോഴും അദ്ദേഹത്തിൻ്റെ രാഷ്ട്രീയ ആദർശങ്ങളെ എതിർക്കുന്ന ഒരാളാണ് ഞാനെങ്കിലും അദ്ദേഹത്തിൻ്റെ ത്യാഗനിർഭരമായ ജീവിതത്തിനും സമർപ്പണത്തിനും മുന്നിൽ നമ്രശിരസ്ക്കനാവാൻ ഞാൻ എന്നും തയ്യാറായിരുന്നു .അദ്ദേഹത്തിൻ്റെ ഓർമ്മകൾക്കു മുന്നിൽ ആദരാഞ്ജലികൾ അർപ്പിക്കുകയും അനുശോചനം രേഖപ്പെടുത്തുകയുംചെയ്യുന്നു”- ഗോവ ഗവർണർ പി എസ് ശ്രീധരൻ പിള്ള അനുസ്മരിച്ചു

“സാധാരണ മനുഷ്യർക്കും മണ്ണിനും വേണ്ടിയുള്ള അതിജീവനപോരാട്ടങ്ങളിൽ എന്നും ജനപക്ഷത്തു ഉറച്ചുനിന്നുപ്രവർത്തിച്ച വിഎസ് യുവജനങ്ങളിൽ ജനാധിപത്യപ്രക്രിയയിലുള്ള പ്രത്യാശ വർധിപ്പിക്കുന്നതിൽ നിർണ്ണായക പങ്ക് വഹിച്ചു”-അനുശോചനസന്ദേശത്തിൽ ആനന്ദ ബോസ് അനുസ്മരിച്ചു.