ബിജെപി നേതാവ് സോണാലി ഫൊഗാട്ടിന്റെ മരണം കൊലപാതകം തന്നെ; മൃതദേഹത്തിൽ ഒന്നിലധികം മൂർച്ചയേറിയ മുറിവുകളെന്ന് പോസ്റ്റുമോർട്ടം റിപ്പോർട്ട്; കൊലപാതകത്തിന് കേസ്സെടുത്ത് ഗോവ പോലീസ്; കൂടെയുണ്ടായിരുന്നവരെ തിരയുന്നു

ഗോവ: ബിജെപി നേതാവ് സോണാലി ഫൊഗാട്ടിന്റെ മരണത്തിൽ കൊലപാതകത്തിന് കേസ്സെടുത്ത് ഗോവ പോലീസ്. മൃതദേഹത്തിൽ ഒന്നിലധികം മൂർച്ചയേറിയ മുറിവുകളുണ്ടെന്ന പോസ്‌റ്റുമോർട്ടം റിപ്പോർട്ടിനെ തുടർന്നാണ് നടപടി. ഒപ്പമുണ്ടായിരുന്ന ജീവനക്കാരെ പോലീസ് തിരയുന്നു. 42 വയസ്സുകാരിയായ ബിജെപി നേതാവിന്റെ മരണം ഹൃദയാഘാതമെന്നായിരുന്നു ആദ്യഘട്ടത്തിൽ പോലീസ് സംശയിച്ചിരുന്നത്.

സോണാലിയുടെ മരണം കൊലപാതകമാണെന്ന് ആരോപിച്ച് സഹോദരന്‍ പരാതി നല്‍കിയ വാര്‍ത്തകള്‍ നേരത്തെ പുറത്തുവന്നിരുന്നു. എന്നാല്‍ ബലാത്സംഗം അടക്കമുള്ളവ സംബന്ധിച്ച അന്വേഷണം നടത്തണമെന്ന ആവശ്യം ഗോവ പോലീസിന് നല്‍കിയ പരാതിയില്‍ സഹോദരന്‍ റിങ്കു ഉന്നയിച്ചിട്ടുണ്ടെന്ന് ദേശീയ മാധ്യമങ്ങള്‍ റിപ്പോര്‍ട്ടുചെയ്തു. സോണാലിയുടെ പി.എ സുധീര്‍ സാങ്‌വാന്‍, അയാളുടെ സുഹൃത്ത് സുഖ്‌വിന്ദര്‍ എന്നിവര്‍ക്കെതിരെയാണ് സോണാലിയുടെ സഹോദരന്‍ ഗുരുതര ആരോപണം ഉന്നയിച്ചിട്ടുള്ളത്. രാഷ്ട്രീയ ഗൂഢാലോചനയടക്കം മരണത്തിന് പിന്നിലുണ്ടാകാം എന്നാണ് ആരോപണം. സാങ്‌വാനും സുഖ്‌വിന്ദറും ചേര്‍ന്ന് കുറേനാളായി സോണാലിയെ ബ്ലാക്ക്‌മെയില്‍ ചെയ്യുകയാണെന്ന് പോലീസിന് നല്‍കിയ പരാതിയില്‍ സഹോദരന്‍ ആരോപിക്കുന്നു. ഭക്ഷണത്തില്‍ മയക്കുമരുന്ന് കലര്‍ത്തി നല്‍കി അബോധാവസ്ഥയിലാക്കി അവര്‍ ചില വീഡിയോ ദൃശ്യങ്ങള്‍ പകര്‍ത്തിയശേഷമാണ് ബ്ലാക്ക്‌മെയില്‍ ചെയ്യാന്‍ ശ്രമിച്ചത് എന്നും പരാതിയില്‍ പറയുന്നുവെന്ന് സീ ന്യൂസ് റിപ്പോര്‍ട്ടുചെയ്തു. സുധീര്‍ സാങ്‌വാന്‍ സോണാലിയെ പലതവണ ഭീഷണിപ്പെടുത്തിയിട്ടുണ്ടെന്നാണ് സഹോദരന്‍ ആരോപിക്കുന്നത്. ഇതിനിടയിലാണ് പോസ്റ്റുമോർട്ടം റിപ്പോർട്ടിൽ കൊലപാതകത്തിന്റെ സൂചനകൾ ലഭിച്ചത്.