“ഏതാനും മണിക്കൂറുകൾക്കകം ശുഭവാർത്തയുണ്ടാകും”; ഇറാൻ സമാധാനക്കരാറിനെക്കുറിച്ച് ദില്ലിയിൽ നിർണായക വെളിപ്പെടുത്തലുമായി യുഎസ് സ്റ്റേറ്റ് സെക്രട്ടറി

ദില്ലി : മൂന്ന് മാസമായി തുടരുന്ന പശ്ചിമേഷ്യൻ യുദ്ധത്തിന് അന്ത്യം കുറിച്ചുകൊണ്ട് ഇറാനുമായുള്ള സമാധാനക്കരാറിൽ ഏതാനും മണിക്കൂറുകൾക്കകം ലോകത്തിന് ഒരു ശുഭവാർത്ത ലഭിച്ചേക്കുമെന്ന് യുഎസ് സ്റ്റേറ്റ് സെക്രട്ടറി മാർക്കോ റൂബിയോ. നാല് ദിവസത്തെ ഔദ്യോഗിക സന്ദർശനത്തിനായി ഇന്ത്യയിലെത്തിയ അദ്ദേഹം, കേന്ദ്ര വിദേശകാര്യമന്ത്രി എസ് ജയശങ്കറുമായി ദില്ലിയിൽ നടത്തിയ സംയുക്ത വാർത്താസമ്മേളനത്തിലാണ് ഈ നിർണായക വിവരം പുറത്തുവിട്ടത്. അമേരിക്കയും ഇസ്രായേലും സംയുക്തമായി നടത്തിയ ആക്രമണത്തിന് പിന്നാലെ ഇറാൻ ഭാഗികമായി ഉപരോധിച്ച ഹോർമുസ് കടലിടുക്കിലെ പ്രതിസന്ധികൾക്ക് പുതിയ കരാർ പരിഹാരമുണ്ടാക്കുമെന്നും റൂബിയോ പ്രത്യാശ പ്രകടിപ്പിച്ചു.

ആഗോളതലത്തിൽ വൻ ആശങ്കയുയർത്തുന്ന ഇറാന്റെ ആണവ പദ്ധതികളെ പൂർണ്ണമായും ഇല്ലാതാക്കുക എന്നതാണ് യുഎസ് പ്രസിഡന്റ് ഡൊണാൾഡ് ട്രംപിന്റെ അന്തിമ ലക്ഷ്യമെന്ന് റൂബിയോ വ്യക്തമാക്കി. ഇറാൻ ഒരിക്കലും ഒരു ആണവായുധം കൈവശം വെക്കാൻ അമേരിക്ക അനുവദിക്കില്ല. രാജ്യാന്തര നിയമങ്ങളെല്ലാം കാറ്റിൽപ്പറത്തിക്കൊണ്ട് രാജ്യാന്തര കപ്പൽചാലായ ഹോർമുസ് കടലിടുക്കിലൂടെയുള്ള വാണിജ്യ കപ്പലുകളെ ഇറാൻ ഭീഷണിപ്പെടുത്തുന്നത് നിയമവിരുദ്ധമാണെന്നും അദ്ദേഹം ഓർമ്മിപ്പിച്ചു. ഇതിനിടെ, ഇസ്രായേൽ പ്രധാനമന്ത്രി ബെന്യാമിൻ നെതന്യാഹുവുമായും മറ്റ് സഖ്യകക്ഷികളുമായും നടത്തിയ ചർച്ചകൾക്ക് ശേഷം ഇറാനുമായുള്ള സമാധാനക്കരാർ ഏതാണ്ട് പൂർണ്ണമായി ഉറപ്പിച്ചതായി ഡൊണാൾഡ് ട്രംപും തന്റെ സോഷ്യൽ മീഡിയ പ്ലാറ്റ്‌ഫോമിലൂടെ വ്യക്തമാക്കിയിരുന്നു.

എന്നാൽ, ഹോർമുസ് കടലിടുക്കിന്റെ പൂർണ്ണമായ തുറന്നുനൽകലുമായി ബന്ധപ്പെട്ട ട്രംപിന്റെ അവകാശവാദങ്ങളെ ഇറാൻ തള്ളിക്കളഞ്ഞു. യുദ്ധത്തിന് മുൻപുള്ള അവസ്ഥയിലേക്ക് കപ്പലുകളുടെ എണ്ണം പുനഃസ്ഥാപിക്കാൻ മാത്രമേ തങ്ങൾ സമ്മതിച്ചിട്ടുള്ളൂ എന്നും കടലിടുക്കിന്റെ പൂർണ്ണ നിയന്ത്രണം ടെഹ്‌റാന് തന്നെയായിരിക്കുമെന്നുമാണ് ഇറാന്റെ നിലപാട്. ഇതോടൊപ്പം, അമേരിക്ക ഉന്നയിക്കുന്ന ആണവ ചർച്ചകൾ ഈ ഘട്ടത്തിൽ കരാറിന്റെ ഭാഗമായിട്ടില്ലെന്നും ട്രംപിന്റെ പ്രസ്താവനകൾ വെറും പ്രചാരണം മാത്രമാണെന്നും ഇറാൻ റെവല്യൂഷണറി ഗാർഡ് വ്യക്തമാക്കി. ആണവ വിഷയത്തിൽ ഇറാൻ ഇതുവരെ യാതൊരുവിധ ഉറപ്പുകളും നൽകിയിട്ടില്ലെന്ന് വ്യക്തമാക്കിയതോടെ കരാറിന്റെ അന്തിമരൂപത്തെക്കുറിച്ച് ഇപ്പോഴും സങ്കീർണ്ണതകൾ നിലനിൽക്കുന്നുണ്ട്.