കണ്ണൂര്: കൊടുംകുറ്റവാളി ഗോവിന്ദച്ചാമിയെ കണ്ണൂര് സെന്ട്രല് ജയിലില്നിന്ന് വിയ്യൂര് സെന്ട്രല് ജയിലിലെത്തിച്ചു. ഇന്നലെ കണ്ണൂർ ജയില് ചാടിയതിന്റെ പശ്ചാത്തലത്തിലാണ് ജയിൽമാറ്റം. ഇത് സംബന്ധിച്ച ഉത്തരവ് ഇന്നലെ തന്നെ പുറത്തിറങ്ങിയിരുന്നു.
വിയ്യൂരില് ഏകാന്ത സെല്ലിലാണ് ഗോവിന്ദച്ചാമിയെ പാര്പ്പിക്കുക. വിയ്യൂരില് നിലവില് 125 കൊടുംകുറ്റവാളികള് മാത്രമാണുള്ളത്. 4.2 മീറ്ററാണ് സെല്ലിന്റെ ഉയരം. സെല്ലിലുള്ളവര്ക്ക് പരസ്പരം കാണാനോ സംസാരിക്കാനോ സാധിക്കില്ല. ഭക്ഷണം സെല്ലില് ഇരുന്നുകൊണ്ട് തന്നെ കഴിക്കണം. 6 മീറ്റര് ഉയരത്തില് 700 മീറ്റര് ചുറ്റളവിലാണ് വിയ്യൂരില് ചുറ്റുമതില് പണിതിരിക്കുന്നത്.
അതേസമയം ഗോവിന്ദച്ചാമി ജയിൽചാടിയ സംഭവത്തിൽ കണ്ണൂർ സെൻട്രൽ ജയിലിലെ നാല് ഉദ്യോഗസ്ഥരെ ജയില് വകുപ്പ് സസ്പെന്ഡ് ചെയ്തിട്ടുണ്ട്. സെന്ട്രല് ജയിലിനകത്തെ ഇലക്ട്രിക് ഫെന്സിങും സിസിടിവികളും പ്രവര്ത്തനക്ഷമമാണോ എന്നത് ഉള്പ്പെടെയുള്ള കാര്യങ്ങളിലും പരിശോധനകള് തുടരുകയാണ്.
