ഗുരുവായൂരിലെ സ്വർണക്കവർച്ച; മോഷണം പോയ രണ്ടര കിലോ സ്വർണവും 35 ലക്ഷം രൂപയും കണ്ടെടുത്ത് പോലീസ്

തൃശൂർ: ഗുരുവായൂരിലെ പ്രവാസിയുടെ വീട്ടിൽ നിന്ന് മോഷണം പോയ രണ്ടര കിലോ സ്വർണവും 35 ലക്ഷം രൂപയും കണ്ടെടുത്ത് പോലീസ്. ഗുരുവായൂർ സ്വദേശി സ്വർണ വ്യാപാരി ബാലന്റെ വീട്ടിൽ നിന്നും മോഷണം പോയ സ്വർണവും പണവുമാണ് പോലീസ് കണ്ടെടുത്തത്. പ്രതിയായ ധർമ്മരാജിന്റെ എടപ്പാളിലെ വാടക വീട്ടിൽ നിന്നാണ് പോലീസ് ഇവ കണ്ടെടുത്തത്.

ഒരു കിലോയോളം തൂക്കമുള്ള ഉരുക്കിയ സ്വർണകട്ടി, ബിസ്‌കറ്റ് രൂപത്തിലുള്ള ഒരു കിലോ സ്വർണക്കട്ടി, ഇന്ത്യൻ ഓവർസീസ് ബാങ്കിൽ നിന്ന് വാങ്ങിയ 100 ഗ്രാം തങ്ക കട്ടി, സ്വർണ വ്യാപാരി ബാലന്റെ മകളുടെ 15 പവന്റെ താലിമാല, മൂന്ന് കമ്മൽ, രണ്ട് നെക്ക്ലേസ്സ്, ഒരു കൈ ചെയിൻ, ഒരു മാല തുടങ്ങിയ വിലപിടിപ്പുള്ള സാധനങ്ങളായിരുന്നു മോഷണം പോയിരുന്നത്. കൂടാതെ 2 ലക്ഷം രൂപയും.

അടുക്കളയിൽ ഒരു പ്ലാസ്റ്റിക് കവറിൽ പൊതിഞ്ഞ് വച്ചിരുന്ന നിലയിലാണ് മോഷണം പോയ സാധനങ്ങൾ പോലീസ് കണ്ടെടുത്തത്. 35 ലക്ഷം രൂപയും കണ്ടെടുത്തു. സ്വർണ്ണം വിറ്റ പണമാണിതെന്നാണ് പോലീസ് പറയുന്നത്. 500-ന്റെ നോട്ടുകെട്ടുകളായി പ്ലാസ്റ്റിക് ചാക്കിലാണ് പണം സൂക്ഷിച്ചിരുന്നത്. കൂടാതെ മോഷ്ടിച്ച സ്വർണത്തിൽ ഭൂരിഭാഗവും കണ്ടെടുത്തതായി എ.സി.പി. കെ.ജി.സുരേഷ് പറഞ്ഞു. പ്രതിയുടെ വീട്ടിൽ നിന്ന് കണ്ടെടുത്ത സ്വർണവും പണവും നാളെ കോടതിയിൽ സമർപ്പിക്കും.

മെയ് 12-നാണ് ഗുരുവായൂർ സ്വദേശിയും സ്വർണ വ്യാപാരിയുമായ തമ്പുരാൻപടി ബാലന്റെ വീട്ടിൽ നിന്ന് 371 പവൻ സ്വർണവും രണ്ട് ലക്ഷം രൂപയും മോഷണം പോയത്. വീട്ടുകാർ സിനിമക്ക് പോയ തക്കം നോക്കി പ്രതിയായ ധർമ്മരാജ് വിലപിടിപ്പുള്ള വസ്തുക്കൾ കവർച്ച ചെയ്യുകയായിരുന്നു. തുടർന്ന് സംസ്ഥാനം വിട്ട ധർമ്മരാജിനെ കഴിഞ്ഞ 29-നാണ് പോലീസ് ചണ്ഡിഗഡിൽ നിന്ന് അറസ്റ്റ് ചെയ്തത്.

കേസിൽ കഴിഞ്ഞ ദിവസം പ്രതിയുടെ സഹോദരൻ ചിന്നൻ, ബന്ധു രാജു എന്നിവരെ മോഷണ മുതൽ വിൽക്കാൻ സഹായിച്ചതിന് അറസ്റ്റ് ചെയ്തിരുന്നു. റിമാൻഡിൽ കഴിയുന്ന പ്രതികളെ പോലീസ് കസ്റ്റഡിയിൽ വാങ്ങി ചോദ്യം ചെയ്തതിന് പിന്നാലെയാണ് സ്വർണവും പണവും കണ്ടെടുത്തത്. ഇവരെ നാളെ വീണ്ടും കോടതിയിൽ ഹാജരാക്കും.