ദുരിതകാലത്ത് ജനജീവിതം സ്തംഭിപ്പിച്ച് രാഷ്ട്രീയക്കളി; ഇടത് സംഘടനകളുടെ രണ്ട് ദിവസം നീളുന്ന പണിമുടക്ക് നാളെ മുതൽ

തിരുവനന്തപുരം: മഹാമാരി തീർത്ത ദുരിതകാലം കണക്കിലെടുക്കാതെ ജനജീവിതം സ്തംഭിപ്പിച്ച് ഇടത് തൊഴിലാളി സംഘടനകൾ നടത്തുന്ന രണ്ട് ദിവസം നീളുന്ന പണിമുടക്ക് നാളെ തുടങ്ങും. പൊതുഗതാഗതം ഉൾപ്പെടെ നിശ്ചലമാക്കി നടത്തുന്ന സമരം ഫലത്തിൽ കേരളത്തിൽ ഹർത്താലായി മാറുകയാണ്.

കോവിഡിന് ശേഷം സാധാരണക്കാരായ ജനങ്ങൾ അവരുടെ ജീവിതങ്ങൾ കരകയറ്റികൊണ്ടുവരുന്ന സാഹചര്യത്തിലാണ് രാഷ്ട്രീയ പോരിന് വേണ്ടി സ്വകാര്യവാഹനങ്ങൾക്ക് വരെ തടയിട്ട് ഇടത് സംഘടനകൾ ഇത്തരത്തിലുള്ള ദ്വിദിന പണിമുടക്ക് നടത്തുന്നത്.

അതേസമയം, പണിമുടക്കിന് കാരണമായി ഉന്നയിക്കുന്ന വിഷയങ്ങൾ സംസ്ഥാന തലത്തിൽ തന്നെ പരിഹരിക്കാനാകുന്ന ഒന്നാണെന്നും, അതുകൊണ്ട് തന്നെ ഒരു ആചാരം പോലെ എല്ലാ വർഷവും ദേശീയ പണിമുടക്കിന് ആഹ്വാനം ചെയ്യുന്നത് തികച്ചും രാഷ്ട്രീയ പ്രേരിതമാണെന്നും KSTഎംപ്ലോയീസ് സംഘ് യൂണിയൻ പറയുന്നു.

കൂടാതെ കെ എസ് ആർ ടി സിയിൽ ക്ഷാമബത്ത കുടിശ്ശിക നിലനിൽക്കെയാണ് ശമ്പളപരിഷ്കരണം നടപ്പിലാക്കിയത്. അതോടൊപ്പം പെൻഷൻ പരിഷ്ക്കരിക്കാൻ ഇതുവരെ ഇടത് സർക്കാർ തയ്യാറായിട്ടുമില്ല. പങ്കാളിത്തപെൻഷൻ പിൻവലിക്കുമെന്ന ഇടതുപക്ഷ വാഗ്ദാനം പാലിച്ചിട്ടില്ലായെന്നു മാത്രമല്ല, ജീവനക്കാരിൽ നിന്നും ഈടാക്കിയ തുകപോലും പെൻഷൻ സ്കീമിൽ നിക്ഷേപിച്ചിട്ടില്ല.

പൊതുമേഖലാ സ്ഥാപനങ്ങള കമ്പനിവൽക്കരിക്കുന്നതിനെതിരെ ശബ്ദിക്കുന്ന ഇടതുപക്ഷ യൂണിയനുകൾ കെ എസ് ആർ ടി സിക്കു സമാന്തരമായി കെ സ്വിഫ്റ്റ് എന്ന സ്വതന്ത്ര കമ്പനിയെ കണ്ടില്ലെന്നു നടിക്കുകയാണ്. ഡീസൽ വിലവർധനവിനെക്കുറിച്ച് ആവലാതിപ്പെടുന്നവർ തന്നെ കെ എസ് ആർ ടി സിയിൽ നിന്നും 24% നികുതി ഈടാക്കുകയും ചെയ്യുന്നു.

അതേസമയം,തികച്ചും രാഷ്ട്രീയ പ്രേരിതമായ പണിമുടക്കിൽ നിന്നും എല്ലാ കെ എസ് ആർ സി ജീവനക്കാരും പിന്മാറണമെന്നും ഡ്യൂട്ടിക്ക് ഹാജരാവുന്ന ജീവനക്കാർക്ക് മതിയായ സംരക്ഷണം നല്കാൻ സർക്കാരും മാനേജ്മെന്റും തയ്യാറാവണമെന്നും KSTഎംപ്പോയീസ് സംഘ് ആവശ്യപ്പെടുന്നു.