തൊപ്പിയും തൊപ്പിക്കാരും തോറ്റു തൊപ്പിയിട്ടവരും !!

വിവാദ യുട്യൂബർ കണ്ണൂർ സ്വദേശി തൊപ്പി എന്ന മുഹമ്മദ് നിഹാദിനെ കഴിഞ്ഞ ദിവസമായിരുന്നു പോലീസ് കസ്റ്റഡിയിലെടുത്തത്. എറണാകുളത്തെ ഫ്ലാറ്റിൽ നിന്നും വളാഞ്ചേരി പോലീസ് മുറിയുടെ വാതിൽ തകർത്താണ് തൊപ്പിയെ പിടികൂടിയത്. തൊപ്പിക്കെതിരെ പരാതി ലഭിച്ച് മണിക്കൂറുകൾക്കുള്ളിലാണ് പോലീസ് തൊപ്പിയെ അറസ്റ്റ് ചെയ്തത്. എന്നാൽ എസ്.എഫ്.ഐ നേതാക്കളായ കെ.വിദ്യക്കും നിഖിൽ തോമസിനുമെതിരെയും പരാതി ലഭിച്ചപ്പോൾ കേരളാ പോലീസിന്റെ ഈ ആർജവം എവിടെയായിരുന്നു എന്ന് ചോദിച്ചുകൊണ്ട് ഇപ്പോൾ രംഗത്തെത്തുകയാണ് രാഷ്ട്രീയ നിരീക്ഷകനായ ശ്രീജിത്ത് പണിക്കർ. തൊപ്പിയും തൊപ്പിക്കാരും തോറ്റു തൊപ്പിയിട്ടവരും എന്ന അടിക്കുറിപ്പോടെയാണ്‌ ശ്രീജിത്ത് പണിക്കർ ഒരു വീഡിയോ ഫേസ്ബുക്കിൽ പങ്കുവച്ചിരിക്കുന്നത്.

തൊപ്പിയെ അറസ്റ്റ് ചെയ്ത രീതി നമ്മൾ എല്ലാവരും കണ്ടതാണ്. ഇവിടെ കേരള പോലീസ് തെളിയിച്ചത് കുറ്റം ആരോപിക്കപ്പെട്ട വ്യക്തിയെ തങ്ങൾക്ക് ഇങ്ങനെയും അറസ്റ്റ് ചെയ്യാൻ കഴിയും എന്നതാണെന്ന് ശ്രീജിത്ത് പണിക്കർ പറയുന്നു. അതേസമയം, കേരളം വളരെ വലിയ രീതിയിൽ ചർച്ച ചെയ്യുന്ന, എല്ലാവരുടെയും ജീവിതത്തെ ബാധിക്കുന്ന പ്രത്യേകിച്ച് വിദ്യാർഥി സമൂഹത്തെ മൊത്തത്തിൽ ബാധിക്കുന്ന ഒരു പ്രശ്നത്തെ പോലീസ് എങ്ങനെയാണു സമീപിച്ചതെന്നും നമ്മൾ ശ്രദ്ധിക്കേണ്ടതുണ്ട്. വിദ്യയെ കണ്ടുപിടിക്കുന്നതിനാണെങ്കിലും നിഖിൽ തോമസിനെ പിടികൂടുന്നതിനും പോലീസിന്റെ ആർജവം എവിടെയായിരുന്നു എന്നും ശ്രീജിത്ത് പണിക്കർ തുറന്നടിക്കുന്നു. ഇവർ ഒളിവിൽ കഴിഞ്ഞിരുന്ന സ്ഥലം കണ്ടെത്താനോ തൊപ്പിയെ പിടികൂടിയതുപോലെ മുറി ചവിട്ടിപൊളിക്കാനോ ഒന്നും മുതിർന്നില്ലെന്നും ശ്രീജിത്ത് പണിക്കർ തുറന്നടിക്കുന്നു. തൊപ്പി കുറ്റം ചെയ്തിട്ടുണ്ടെങ്കിൽ ശിക്ഷ അനുഭവിക്കണം. അതുപോലെ എല്ലാ കേസുകളിലും പോലീസ് ഒരുപോലെ സമീപിക്കണമെന്നാണ് ശ്രീജിത്ത് പണിക്കർ തുറന്നടിക്കുന്നത്.