‘അദ്ദേഹം ധാരാളം അതിസുന്ദരിമാരെ കണ്ടിട്ടുള്ള വ്യക്തിയാണ്, അപമര്യാദയായി പെരുമാറി എന്ന് കരുതാനാവില്ല; ദുരുദ്ദേശം ആരോപിക്കുന്നത് ശരിയല്ല’; സുരേഷ്‌ ഗോപിക്ക് പിന്തുണയുമായി സിപിഎം എംഎല്‍എ ദലീമ

മയാമി: നടൻ സുരേഷ്‌ ഗോപി ധാരാളം അതിസുന്ദരിമാരെ കണ്ടിട്ടുള്ള വ്യക്തിയാണ്, അങ്ങനെയൊരാള്‍ പൊതുമധ്യത്തില്‍ അപമര്യാദയായി പെരുമാറി എന്ന് കരുതാനാവില്ലെന്ന് സിപിഎം എംഎല്‍എയും ഗായികയുമായ ദലീമ ജോജോ. ദുരുദ്ദേശം ആരോപിക്കുന്നതും ശരിയല്ലെന്ന് ദലീമ പറഞ്ഞു. ഇന്ത്യാ പ്രസ് ക്ലബ് ഓഫ് നോര്‍ത്ത് അമേരിക്കയുടെ വനിതാ ഫോറത്തിലാണ് സുരേഷ് ഗോപിയെ പിന്തുണച്ച് ദലീമ സംസാരിച്ചത്.

ആത്മീയ നേതാക്കള്‍ ജനങ്ങളെ കെട്ടിപ്പിടിക്കാറുണ്ട്, കുട്ടികളെ സ്നേഹത്തോടെ തഴുകാറുണ്ട്, രോഗികളെ തലോടി സാന്ത്വനിപ്പിക്കാറുണ്ട്. അതിനൊന്നും മറ്റൊരര്‍ത്ഥം കാണരുത്. സുരേഷ്‌ഗോപി മാദ്ധ്യമപ്രവര്‍ത്തകയുടെ തോളില്‍ സ്പര്‍ശിച്ചതിനെ ആ നിലയില്‍ മാത്രം കണ്ടാല്‍ മതിയെന്ന് ദലീമ പറഞ്ഞു.
മുന്‍ ഫോമ പ്രസിഡന്റ് അനിയന്‍ ജോര്‍ജ്, മുന്‍ ഫൊക്കാന പ്രസിഡന്റ് ജോര്‍ജി വര്‍ഗീസ് തുടങ്ങി സംസാരിച്ചവരെല്ലാം വിവാദം ഉണ്ടാക്കിയതിന് മാദ്ധ്യമപ്രവര്‍ത്തകയെ രൂക്ഷമായി വിമര്‍ശിച്ചു.