കനത്ത മഴ തുടരുന്നു ; മൂന്നുജില്ലകളിൽ നാളെ വിദ്യാഭ്യാസ സ്ഥാപനങ്ങൾക്ക് അവധി; കാസർഗോഡ് കോളജുകൾക്ക് അവധി ബാധകമല്ല

തിരുവനന്തപുരം : സംസ്ഥാനത്ത് കനത്ത മഴ തുടരുന്ന പശ്ചാത്തലത്തിൽ മൂന്നു ജില്ലകളിൽ നാളെ അവധി പ്രഖ്യാപിച്ചു. വയനാട് ,​ കണ്ണൂർ,​ കാസർഗോഡ് ജില്ലകളിലാണ് കളക്ടർമാർ അവധി പ്രഖ്യാപിച്ചത്. കാസർകോട് ജില്ലയിൽ കോളേജുകൾക്ക് അവധി ബാധകമല്ല. മുൻകൂട്ടി നിശ്ചയിച്ച പരീക്ഷകൾക്ക് മാറ്റമില്ലെന്നും കളക്ടർമാർ അറിയിച്ചു.

കാസർഗോഡ് ജില്ലയിൽ കഴിഞ്ഞ 24 മണിക്കൂറിനിടെ ഉണ്ടായ അതിശക്തമായ മഴയിൽ വെള്ളക്കെട്ടുണ്ടായതിനെ തുടർന്ന് മുൻകരുതൽ നടപടിയുടെ ഭാഗമായാണ് അവധി പ്രഖ്യാപിച്ചത്. ജില്ലയിലെ സ്റ്റേറ്റ്,​ സി.ബി.എസ്.ഇ,​ ഐ.സി.എസ്.ഇ,​ സ്കൂളുകൾ,​ കേന്ദ്രീയ വിദ്യാലയങ്ങൾ,​ അങ്കണവാടികൾ,​ മദ്രസകൾ തുടങ്ങിയവയ്ക്കാണ് ജില്ലാകളക്ടർ കെ.ഇമ്പശേഖർ അവധി പ്രഖ്യാപിച്ചത്. അതേസമയം കോളേജുകൾക്ക് അവധി ബാധകമാക്കിയിട്ടില്ല. മുൻകൂട്ടി നിശ്ചയിച്ച പരീക്ഷകൾക്കും മാറ്റമില്ല.

കണ്ണൂർ ജില്ലയിലെ അങ്കണവാടികൾ,​ ഐ.സി.എസ്.ഇ,​ സി.ബി.എസ്.ഇ സ്കൂളുകൾ,​ കേന്ദ്രീയ വിദ്യാലയങ്ങൾ,​ മദ്രസകൾ,​ ട്യൂഷൻ സെന്ററുകൾ എന്നിവയ്ക്കടക്കം അവധി ബാധകമാണ്. മുൻനിശ്ചയ പ്രകാരമുള്ള പൊതുപരീക്ഷകൾ,​ യൂണിവേഴ്‌സിറ്റി പരീക്ഷകൾ എന്നിവയ്ക്ക് മാറ്റമുണ്ടായിരിക്കില്ല.

വയനാട് ജില്ലയിൽ പ്രൊഫഷണൽ കോളേജുകൾ,​ അങ്കണവാടികൾ,​ ട്യൂഷൻ സെന്ററുകൾ ഉൾപ്പെടെയുള്ള എല്ലാ വിദ്യാഭ്യാസ സ്ഥാപനങ്ങൾക്കും അവധിയായിരിക്കും. മുൻകൂട്ടി നിശ്ചയിച്ച പരീക്ഷകൾക്കും പി.എസ്.സി പരീക്ഷകൾക്കും അവധി ബാധകമല്ല. മോഡൽ റസിഡൻഷ്യൽ,​ നവോദയ സ്കൂളുകൾക്ക് അവധി ബാധകമല്ല.