ഉത്തരേന്ത്യയിൽ കനത്തമഴ; യമുന നദിയിലെ ജലനിരപ്പ് 206.44 ആയി, മഴക്കെടുതി രൂക്ഷം

ഉത്തരേന്ത്യയിൽ ഇടതടവില്ലാതെ മഴ പെയ്യുകയാണ്. ശക്തമായ മഴ കാരണം യമുന നദിയിലെ ജലനിരപ്പ് 206.44 ആയി ഉയർന്നു. ഓൾഡ് യമുന ബ്രിഡ്ജ് ഇന്നലെ രാത്രി മുതൽ അടച്ചു, തീവണ്ടി ഗതാഗതം വഴിതിരിച്ചു വിട്ടു. ഇതുവഴി ഉള്ള തീവണ്ടികൾ ദില്ലി വഴി പോകും എന്ന് റെയിൽവേ അറിയിച്ചു. ഹിമാചൽ പ്രദേശിൽ ഇന്നലെ മഴക്കെടുതിയിൽ 5 മരണം റിപ്പോർട്ട് ചെയ്തിട്ടുണ്ട്. ഹിമാചലിൽ മഴക്കെടുതി കാരണം 700 റോഡുകൾ അടച്ചു എന്ന് അധികൃതർ അറിയിച്ചിട്ടുണ്ട്. ദില്ലി ഉത്തരാഖണ്ഡ് ഹിമാചൽ എന്നിവിടങ്ങളിൽ ഇന്ന് ഓറഞ്ച് അലർട്ടാണ്.

മഹാരാഷ്ട്രയിലെ റായ്ഗഡിലെ ഇർഷൽവാഡി ഗ്രാമത്തിലുണ്ടായ മണ്ണിടിച്ചിലിനെ തുടർന്ന് നടത്തുന്ന രക്ഷാപ്രവർത്തനം ഭരണകൂടം നിർത്തിവച്ചു. ഉരുൾപൊട്ടൽ 27 പേരുടെ മരണത്തിനിടയാക്കിയിരുന്നു. കാണാതായ 78 പേരെ ഇതുവരെ കണ്ടെത്തനായില്ലെന്നും അധികൃതർ അറിയിച്ചു. രക്ഷാപ്രവർത്തകരും സംസ്ഥാന സർക്കാരും ഗ്രാമവാസികളും തമ്മിൽ നടത്തിയ ചർച്ചയിലാണ് തീരുമാനം. ശനിയാഴ്ച കണ്ടെടുത്ത അവസാനത്തെ മൃതദേഹം അഴുകിയ നിലയിലായിരുന്നുവെന്ന് ഉദ്യോഗസ്ഥർ പറഞ്ഞു.