ചരിത്ര സന്ദർശനത്തിന് തുടക്കം; പാരീസിലെത്തിയ പ്രധാനമന്ത്രി നരേന്ദ്രമോദിയുടെ പരിപാടികൾ ഇങ്ങനെ

രണ്ട് ദിവസത്തെ ഫ്രാൻസ് സന്ദർശനത്തിനായി പ്രധാനമന്ത്രി നരേന്ദ്ര മോദി പാരീസിൽ എത്തി. വൈകിട്ട് 7.30ന് പ്രധാനമന്ത്രി മോദി സെനറ്റിലെത്തി സെനറ്റ് പ്രസിഡന്റ് ജെറാഡ് ലാർച്ചറെ കാണും.
ഏകദേശം 8.45ന് പ്രധാനമന്ത്രി ഫ്രഞ്ച് പ്രധാനമന്ത്രി മിസ് എലിസബത്ത് ബോണുമായി കൂടിക്കാഴ്‌ച നടത്തും.
പ്രധാനമന്ത്രി മോദി അടുത്തതായി ലാ സീൻ മ്യൂസിക്കേലിൽ രാത്രി 11 മണിക്ക് (IST) ഇന്ത്യൻ കമ്മ്യൂണിറ്റി പരിപാടിയെ അഭിസംബോധന ചെയ്യും. അതിനുശേഷം ഫ്രഞ്ച് പ്രസിഡന്റ് ഇമ്മാനുവൽ മക്രോണിന്റെ നേതൃത്വത്തിൽ ഒരുക്കിയ അത്താഴത്തിനായി പ്രധാനമന്ത്രി മോദി എലിസി കൊട്ടാരത്തിലെത്തും.

ഫ്രാൻസിൽ നിന്ന് 26 റാഫേൽ എം നേവൽ ജെറ്റുകളും മൂന്ന് അധിക സ്കോർപീൻ അന്തർവാഹിനികളും വാങ്ങുന്നതിനുള്ള കരാർ പ്രധാനമന്ത്രിയുടെ സന്ദർശന വേളയിൽ പ്രഖ്യാപിക്കുമെന്നാണ് പ്രതീക്ഷ.
ഏകദേശം 90,000 കോടി രൂപയുടെ ഇടപാടുകളിൽ 22 സിംഗിൾ സീറ്ററും നാല് ഡബിൾ സീറ്റർ ട്രെയിനർ പതിപ്പും അടങ്ങുന്ന 26 റഫാൽ എം വിമാനങ്ങൾ ഉൾപ്പെടുമെന്നാണ് വിവരം.