പിങ്ക് പൊലീസ് പൊതുജനമധ്യത്തിൽ അപമാനിച്ച കുട്ടിക്ക് ഒന്നരലക്ഷം നഷ്​ടപരിഹാരം നല്‍കാൻ ഹൈകോടതി ഉത്തരവ്: ഉദ്യോഗസ്ഥക്കെതിരെ കടുത്ത നടപടി

കൊച്ചി: ആറ്റിങ്ങലിൽ മൊബൈൽ മോഷ്ടിച്ചെന്നാരോപിച്ച് പിങ്ക് പൊലീസ് പൊതുജനമധ്യത്തിൽ അപമാനിച്ച പെൺകുട്ടിക്ക് ഒന്നരലക്ഷം രൂപ നഷ്​ടപരിഹാരം നല്‍കാൻ ഹൈകോടതി ഉത്തരവിട്ടു.

പൊലീസുകാരിക്കെതിരെ അച്ചടക്ക നടപടി എടുക്കണമെന്ന് നിർദേശം നൽകിയ കോടതി, പരാതിക്കാരിയായ കുട്ടിക്ക് 25,000 രൂപ കോടതിച്ചെലവായി നൽകണമെന്നും ഉത്തരവിട്ടു. ഒന്നര ലക്ഷം രൂപ സർക്കാറാണ് നഷ്ടപരിഹാരമായി നൽകേണ്ടത്.

അതേസമയം സംഭവത്തിൽ കുറ്റക്കാരിയായ പൊലീസ് ഉദ്യോഗസ്ഥക്ക് ജനങ്ങളുമായി ഇടപെടുന്നത് സംബന്ധിച്ച് പ്രത്യേക പരിശീലനം നൽകണം. ക്രമസമാധാന പരിപാലനത്തിൽ നിന്ന് ഇവരെ മാറ്റിനിർത്തണമെന്നും കോടതി വ്യക്തമാക്കി. പെൺകുട്ടി നഷ്ടപരിഹാരത്തിന് അർഹയാണെന്ന് കോടതി നേരത്തെ തന്നെ ചൂണ്ടിക്കാട്ടിയിരുന്നു.

നേരത്തെ നമ്പി നാരായണന് സർക്കാർ നഷ്ടപരിഹാരം നൽകിയ മാതൃകയിൽ കുട്ടിക്കും നൽകണമെന്ന് കോടതി നിർദേശിച്ചെങ്കിലും നഷ്ടപരിഹാരം നൽകാനാവില്ലെന്ന മറുപടിയാണ് സർക്കാർ നൽകിയത്. ഉ​ദ്യോ​ഗ​സ്ഥ​ക്കെ​തി​രെ കൂ​ടു​ത​ൽ ശി​ക്ഷ ആ​വ​ശ്യ​മി​ല്ലെന്നും കുട്ടിയുടെ മൗ​ലി​കാ​വ​കാ​ശം ലം​ഘി​ക്ക​പ്പെ​ട്ടി​ട്ടി​ല്ലെ​ന്നുമായിരുന്നു സ​ർ​ക്കാ​ർ വാ​ദം.