അധികജോലിയുള്ളതിനാൽ ഭാര്യ ജോലി കഴിഞ്ഞെത്താൻ വൈകി; ഉറങ്ങിക്കിടന്ന സഹോദരിമാരുടെ ദേഹത്ത് മണ്ണെണ്ണെ ഒഴിച്ച് തീകൊളുത്തി അച്ഛൻ ആത്മഹത്യ ചെയ്തു; സഹോദരിമാരിലൊരാൾ മരിച്ചു

കന്യാകുമാരി : ഉറങ്ങിക്കിടന്ന പെൺമക്കളുടെ ദേഹത്ത് മണ്ണെണ്ണ ഒഴിച്ചു തീകൊളുത്തിയ ശേഷം അച്ഛൻ ആത്മഹത്യ ചെയ്ത സംഭവത്തിൽ പൊള്ളലേറ്റ ചികിത്സയിലായിരുന്ന ആറാം ക്ലാസ് വിദ്യാർത്ഥിനി മരിച്ചു. സംഭവത്തിൽ ചികിത്സയിലായിരുന്ന ധൻസിഹ (11) യാണ് ഇന്നലെ രാത്രിയോടെ മരിച്ചത്. പൊള്ളലേറ്റ സഹോദരി അസ്മിത (9) ഗുരുതരാവസ്ഥയിൽ ആശാരി പള്ളം മെഡിക്കൽ കോളേജ് ആശുപത്രിയിൽ ചികിത്സയിലാണ്. കന്യാകുമാരി ചുങ്കാൻ കട പരശ്ശേരി രാജഗോപാൽ തെരുവിലാണ് നാടിനെ നടുക്കിയ സംഭവം നടന്നത്.

ഇക്കഴിഞ്ഞ ബുധനാഴ്ച രാത്രിയിലാണ് നാടിനെ നടുക്കിയ സംഭവം നടന്നത്. കുട്ടികളുടെ അച്ഛനായ നാഗരാജൻ മദ്യലഹരിയാണ് വീട്ടിലെത്തിയത്. ബേക്കറിയിലെ ജീവനക്കാരിയായിരുന്ന ഭാര്യ അനിത ബേക്കറിയിൽ അധികജോലിയുള്ളതിനാൽ ആ സമയം വീട്ടിൽ ഇല്ലായിരുന്നു. മദ്യലഹരിയിലായിരുന്ന നാഗരാജൻ ഉറങ്ങിക്കിടന്ന പെൺമക്കളുടെ ദേഹത്ത് മണ്ണെണ്ണ ഒഴിച്ചു തീ കൊളുത്തിയ ശേഷം സ്വന്തം ശരീരത്തിലും മണ്ണെണ്ണ ഒഴിച്ചു തീ കൊളുത്തി മരിക്കുകയായിരുന്നു. നാഗരാജൻ പതിവായി മദ്യപിച്ചെത്തിയ ശേഷം ഭാര്യയെ മർദ്ദിക്കുന്നത് പതിവാണെന്നാണ് പരിസരവാസികൾ പറയുന്നത്. മദ്യപാനിയായ നാഗരാജൻ വീട്ടു ചെലവിനുപോലും പണം കൊടുക്കാറില്ലെന്നും സാമ്പത്തിക ബുദ്ധിമുട്ട് കാരണം ഭാര്യ അനിത വീടിന് സമീപത്തെ ബേക്കറിയിൽ ജോലി ചെയ്തുവരുകയായിരുന്നുവെന്ന് ഇരണിയൽ പൊലീസ് വ്യക്തമാക്കി.

ഭർത്താവായ നാഗരാജൻ സംഭവസ്ഥലത്ത് തന്നെ മരണപ്പെട്ടു. കുട്ടികൾ രണ്ടു പേരും ഗുരുതരാവസ്ഥയിൽ നാഗർകോവിൽ ആശാരി പള്ളം മെഡിക്കൽ കോളേജിൽ ചികിത്സയിലായിരുന്നു.