ഹിസ്ബുള്ളയ്ക്ക് ഇനി അനങ്ങാൻ കഴിയില്ല; ഇസ്രായേൽ വ്യോമാക്രമണത്തിൽ തവിടുപൊടിയാക്കിയത് റോക്കറ്റ് ലോഞ്ചിങ് പാഡുകൾ; പേജർ ആക്രമണം ഇന്ന് ഐക്യരാഷ്ട്ര സഭയിൽ

ഹിസ്ബുള്ള ഭീകരരുടെ പേജറുകളും വാക്കി ടോക്കികളും പൊട്ടിത്തെറിച്ചതിന് പിന്നാലെ ഇസ്രായേൽ തെക്കൻ ലെബണനിൽ നടത്തിയ വ്യാമാക്രമണത്തിൽ തകർന്നത് ഹിസ്ബുള്ളയുടെ റോക്കറ്റ് വിക്ഷേപണ കേന്ദ്രങ്ങളെന്ന് സൂചന. നൂറിൽപ്പരം റോക്കറ്റ് വിക്ഷേപണ കേന്ദ്രങ്ങളാണ് ഇന്നലത്തെ വ്യോമാക്രമണത്തിൽ തകർത്തത്. ഹമാസ് നേതാവിന്റെ വധത്തിന് തിരിച്ചടി നൽകാനായി ഇസ്രായേലിലേക്ക് റോക്കറ്റ് ആക്രമണം നടത്താൻ തയ്യാറെടുക്കുകയായിരുന്നു ഹിസ്ബുള്ള. ഈ വിക്ഷേപണ കേന്ദ്രങ്ങളിൽ നിന്നാണ് ഇസ്രയേലിനെതിരെ ഹിസ്ബുള്ള റോക്കറ്റുകൾ വിക്ഷേപിക്കുന്നത്. കനത്ത ബോംബിങ് ആണ് ഇന്നലെ ഹിസ്ബുള്ള കേന്ദ്രങ്ങളിൽ ഇസ്രായേൽ നടത്തിയത്.

ഇസ്രായേൽ എല്ലാ സീമകളും ലംഘിക്കുന്നതായും കനത്ത തിരിച്ചടിക്ക് തയ്യാറെടുക്കാനും ഇന്നലെ ഹസൻ നസറുള്ള ടെലിവിഷനിലൂടെ ആഹ്വനം ചെയ്‌തിരുന്നു. നസറുള്ളയുടെ അഭിസംബോധന നടക്കുന്ന അതെ സമയം തന്നെ ഇസ്രായേൽ വ്യോമാക്രമണം ആരംഭിച്ചിരുന്നു. പേജർ ആക്രമണങ്ങൾ ലബനൻ ഐക്യരാഷ്ട്രസഭയിൽ ഉന്നയിച്ചിട്ടുണ്ട്. ഐക്യരാഷ്ട്രസഭ വിഷയം ഇന്ന് ചർച്ച ചെയ്യും. പേജർ ആക്രമണങ്ങളുടെ ഉത്തരവാദിത്തം ഇസ്രായേൽ ഇതുവരെ ഏറ്റെടുത്തിട്ടില്ല. എന്നാൽ ഇസ്രയേലിന്റെ രഹസ്യാന്വേഷണ വിഭാഗമായ മൊസാദ് ആണ് പേജർ ഓപ്പറേഷൻ നടത്തിയതെന്നാണ് ലബനൻ ആരോപിക്കുന്നത്. ഹിസ്ബുള്ള ഭീകരർ ആശയ വിനിമയത്തിന് ഉപയോഗിക്കുന്ന പേജറുകൾ ഒരേ സമയം പൊട്ടിത്തെറിക്കുകയായിരുന്നു. നിരവധിപേർക്ക് ഈ ആക്രമണത്തിൽ പരിക്കേറ്റിരുന്നു.