മസാലാ ബോണ്ട് ഇടപാടിന്റെ ഉത്തരവാദിത്തം തനിക്ക് മാത്രമല്ല; തീരുമാനമെടുത്തത്‌ മുഖ്യമന്ത്രി അദ്ധ്യക്ഷനായ ഡയറക്ടർ ബോർഡ്; ഇ ഡി ക്ക് മുന്നിൽ ഹാജരാകാതെ മുഖ്യമന്ത്രിയെ കയ്യൊഴിഞ്ഞ് തോമസ് ഐസക്കിന്റെ കത്ത്

തിരുവനന്തപുരം: മസാല ബോണ്ട് ഇടപാടിൽ ഉത്തരവാദിത്തം തനിക്ക് മാത്രമല്ലെന്നും തീരുമാനമെടുത്തത് മുഖ്യമന്ത്രി അദ്ധ്യക്ഷനായ ഡയറക്ടർ ബോർഡ് ആണെന്നും മുൻ ധനമന്ത്രി തോമസ് ഐസക്. തനിക്ക് ധനമന്ത്രി എന്ന നിലയിലുള്ള ഉത്തരവാദിത്തം മാത്രമേയുള്ളുവെന്നും അദ്ദേഹം കൂട്ടിച്ചേർത്തു. കേന്ദ്ര അന്വേഷണ ഏജൻസിയായ എൻഫോഴ്‌സ്‌മെന്റ് ഡയറക്ടറേറ്റിന് നൽകിയ കത്തിലാണ് തോമസ് ഐസക്ക് ഇക്കാര്യങ്ങൾ അറിയിച്ചത്. നേരത്തെ മസാല ബോണ്ട് അഴിമതിക്കേസിൽ തോമസ് ഐസക്കിന് ഇ ഡി പുതിയ സമൻസ് നൽകിയിരുന്നു. അതനുസരിച്ച് അദ്ദേഹം തിങ്കളാഴ്ച ചോദ്യം ചെയ്യലിന് ഹാജരാകേണ്ടതായിരുന്നു. എന്നാൽ അന്വേഷണ ഏജൻസിക്ക് മുന്നിൽ ഹാജരാകാതെ ഇപ്പോഴും ഒളിച്ചു കളിക്കുകയാണ് മുൻ ധനമന്ത്രി.

2150 കോടി രൂപയാണ് 2018-19 സാമ്പത്തിക വർഷത്തിൽ കേരളം മസാല ബോണ്ടിറക്കി വിദേശ ഫണ്ട് സ്വരൂപിച്ചത്. ഇന്ത്യയിലാദ്യമായാണ് ഒരു സംസ്ഥാനം മസാല ബോണ്ട് ഇറക്കുന്നത്. നടപടി സംസ്ഥാനത്തിന് വൻ പലിശ ബാധ്യതയുണ്ടാക്കുമെന്നും ഗുണഭോക്താവ് വിദേശ കമ്പനിയാണെന്നും നേരത്തെ ആരോപണമുണ്ടായിരുന്നു. ഇടപാട് ഭരണഘടനയുടെ 293 (1) ന്റെ ലംഘനമാണെന്നും സി എ ജി നേരത്തെ കണ്ടെത്തിയിരുന്നു. വിദേശ നാണയ വിനിമയ ചട്ടങ്ങളുടെ ലംഘനവും അഴിമതിയും ഇടപാടിൽ നടന്നിട്ടുണ്ടെന്നാണ് ഇ ഡി സംശയിക്കുന്നത്. ഈ കേസിലാണ് ഏജൻസി തോമസ് ഐസക്കിന് ചോദ്യം ചെയ്യലിന് ഹാജരാകാനുള്ള സമൻസ് നൽകിയിരിക്കുന്നത്.