ദില്ലി : രാജ്യത്തെ ഫുട്ബോൾ ആരാധകർക്ക് കനത്ത നിരാശ സമ്മാനിച്ചു കൊണ്ട് ഇന്ത്യന് സൂപ്പര് ലീഗ് (ഐഎസ്എല്) അനിശ്ചിതകാലത്തേക്ക് മാറ്റി. സംപ്രേഷണാവകാശ കരാര് തര്ക്കത്തെ തുടര്ന്നാണ് ടൂർണമെന്റ് അനിശ്ചിതകാലത്തേക്ക് മാറ്റിയത്. സെപ്റ്റംബർ മാസത്തിലായിരുന്നു ഇക്കൊല്ലത്തെ ഐഎസ്എൽ സീസൺ തുടങ്ങേണ്ടിയിരുന്നത്.
റിലയന്സ് ഗ്രൂപ്പിന്റെ കീഴിലുള്ള ഫുട്ബോള് സ്പോര്ട്സ് ഡവലപ്മെന്റ് ലിമിറ്റഡാണ് (എഫ്എസ്ഡിഎല്) ഐഎസ്എല് നടത്തിപ്പുകാര്. അഖിലേന്ത്യാ ഫുട്ബോള് ഫെഡറേഷനുമായുള്ള (എഐഎഫ്എഫ്) മാസ്റ്റര് റൈറ്റ് എഗ്രിമെന്റ് (എംആര്എ) പുതുക്കുന്ന കാര്യത്തില് തീരുമാനമാകാത്ത സാഹചര്യത്തിലാണ് ഇത്തവണത്തെ സീസണ് മാറ്റിവെയ്ക്കാനുള്ള തീരുമാനം. ഫെഡറേഷനും എഫ്എസ്ഡിഎലുമായുള്ള കരാര് ഡിസംബറില് അവസാനിക്കുകയാണ്. കരാര് പുതുക്കുന്നതു സംബന്ധിച്ച് നീക്കങ്ങളൊന്നും നടന്നിരുന്നില്ല. കരാറനുസരിച്ച് എഫ്എസ്ഡിഎല് വര്ഷത്തില് 50 കോടി രൂപ ഫെഡറേഷന് നല്കുന്നുണ്ട്. പകരമായി മത്സരങ്ങളുടെ സംപ്രേഷണം ഉള്പ്പെടെയുള്ള വാണിജ്യ അവകാശങ്ങള് എഫ്എസ്ഡിഎലിന് ലഭിക്കും.
ഫെഡറേഷന്റെ പുതിയ ഭരണഘടന പ്രാബല്യത്തിലാവുന്നതുവരെ നിലവിലെ ഭാരവാഹികള് സുപ്രധാന തീരുമാനങ്ങളൊന്നും എടുക്കരുതെന്ന സുപ്രീംകോടതി നിര്ദേശവും കരാര് പുതുക്കുന്നതിന് തടസമായി. ഇതോടെ അഖിലേന്ത്യ ഫുട്ബോള് ഫെഡറേഷന് 2025-26 സീസണിനായുള്ള വാര്ഷിക കലണ്ടറില് നിന്ന് ഐഎസ്എല്ലിനെ ഒഴിവാക്കിയിരുന്നു.
