തൃശൂരിൽ ഗര്‍ഭിണിയായ യുവതിക്ക് നേരെ ഭർത്താവിൻ്റെ ക്രൂര മർദ്ദനം; പീഡനം സ്ത്രീധനത്തിന്റെ പേരിലായിരുന്നെന്ന് മാതാവ്

തൃശൂർ: നാല് മാസം ഗര്‍ഭിണിയായ യുവതിയെ ഭർത്താവ് ക്രൂരമായി മർദ്ദിച്ചു. ദേശമംഗലം വറവട്ടൂര്‍ അയ്യോട്ടില്‍ മുസ്തഫയുടെ മകള്‍ ഫാരിസബാനുവിനാണ് മർദ്ദനമേറ്റത്. കടങ്ങോട് മനപ്പടി മണിയാറംകുന്ന് ഷെക്കീറിനെതിരെയാണ് പരാതി.

ചൊവാഴ്ച്ച രാവിലെ യുവതിയെ ക്രൂരമായി മർദ്ദിച്ചുവെന്ന് മാതാവ് ലൈല ആരോപിച്ചു. ഗർഭിണിയെന്ന പരിഗണന പോലും നൽകിയില്ല. കട്ടിലിൽ ചേർത്ത് വച്ച് ഇടിച്ചുവെന്നും സ്ത്രീധനത്തെ ചൊല്ലിയുള്ള പീഡനം തുടർച്ചയായിരുന്നുവെന്നും മാതാവ് ലൈല വ്യക്തമാക്കി.

യുവതിയുടെ ആദ്യത്തെ കുഞ്ഞ് പെൺകുട്ടി ആയതിലും ഭർത്താവ് ദേഷ്യം പ്രകടിപ്പിച്ചിരുന്നു. രണ്ടാം തവണ ഗർഭിണിയായത് അലസിപ്പിക്കാൻ സമ്മർദ്ദം ചെലുത്തിയെന്നും ഇക്കാര്യം ആവശ്യപ്പെട്ട് മർദ്ദനം ഉണ്ടായിയെന്നും പെൺകുട്ടിയുടെ കുടുംബം ആരോപിച്ചു. മർദ്ദനമേറ്റ യുവതിയെ ഗുരുതരാവസ്ഥയിൽ തൃശൂർ മെഡി. കോളജിൽ പ്രവേശിപ്പിച്ചിട്ടുണ്ട്.