ഐ ലവ് യു പറയുന്നത് കുറ്റകരമല്ല; പോക്‌സോ കേസില്‍ 23കാരനെ വെറുതെ വിട്ട് കോടതി

മുംബൈ: പെണ്‍കുട്ടിയോട് ‘ഐ ലവ് യു’ പറയുന്നത് കുറ്റകരമല്ലെന്ന് കോടതി. ഐ ലവ് യു എന്നത് പെണ്‍കുട്ടിയെ അപമാനിക്കുന്നതല്ലെന്നും സ്‌നേഹം പ്രകടിപ്പിക്കുകയാണെന്നും കോടതി പറഞ്ഞു. പ്രത്യേക ജഡ്ജി കല്‍പ്പന പാട്ടീലാണ് ഐ ലവ് യു എന്ന് പറയുന്നത് പോക്‌സോ പ്രകാരം കുറ്റമല്ലെന്ന് വ്യക്തമാക്കിയത്.

പോക്സോ നിയമപ്രകാരം കേസെടുത്ത 23 കാരനെ വെറുതെവിട്ടുകൊണ്ട് പുറപ്പെടുവിച്ച വിധിയിലാണ് കോടതി ഇക്കാര്യം പറഞ്ഞത്. 17കാരിയുടെ കുടുംബമാണ് 23 കാരനെതിരെ പരാതി നൽകിയത്.

23കാരനായ യുവാവ് പെൺകുട്ടിയോട് താമസസ്ഥലത്തിനടുത്തു വെച്ച് ഐ ലവ് യു എന്ന് പറയുകയും പെണ്‍കുട്ടിയെ തുറിച്ചുനോക്കുകയും കണ്ണിറുക്കുകയും അമ്മയെ ഭീഷണിപ്പെടുത്തുകയും ചെയ്തതായിട്ടാണ് പരാതി. പരാതിയുടെ അടിസ്ഥാനത്തില്‍, വഡാല ടി ടി പോലീസ് പ്രതിക്കെതിരെ പോക്‌സോ പ്രകാരം കേസെടുത്തു. എന്നാല്‍ കുറ്റം തെളിയിക്കാന്‍ മതിയായ തെളിവുകള്‍ ഇല്ലാത്തതിനാല്‍ കോടതി ഇയാളെ കുറ്റവിമുക്തനാക്കുകയായിരുന്നു.